Kawng thawmthat ngai a la tam PWD chana hmalakna beitham
Kawng thawmthat ngai a la tam
PWD chana hmalakna beitham
Mizoram chak lakluhna ber Vairengte to Sairang inkar kawngpui chu thawmthat mek zel a ni a. Lirthei lian tana chetsual leh tluk hlauhawm khawpa khuar thuk leh tlan harsa tam tawh lo mah se, furpui thlen hmaa thawmthat ngai erawh ala awm nual nia ngaih a ni. Hetihlai hian Kawnpui – Khamrang bawra state PWD-in kawng thawmthat hna thawh mekah furpui laia harsatna thleng leh mai thei a nih hlauhthawnawm a awm a, tha zawka thawmthat theih turin sawrkar lamah sum dil mek a ni tih sawi a ni.
Vairengte to Sairang inkar national highway thawmthat mekah hian a tam zawk, km.80 dawn chu NHIDCL (National Highways & Infrastructure Development Corporation Limited) hnuaia awm a ni tawh a, an kuta hlan tur tho km.40 vel chu inhlanchhawn theih mai ala nih loh avangin state PWD-in a enkawl a la ngai thung. NHIDCL lam hian heng kawng hi an lak dawn chuan kawng tha pangngai (in good condition) in a awm phawt tur a ni, tih dan tlawhchhan tur an neih bakah maintenance atan sum ruahman sa an neih loh avangin tunah chuan lakchhawn mai tlak loh khawpin a la awm niin an sawi.
NHIDCL lamin a enkawl china an hnuaia thawk contractor-te chuan kawng hi March ralhmaa thawmthat hman vek an tum tih an sawi a. NHIDCL hotute ngaihdanah chuan working season hi May thla laihawl vel thleng neiah an inngai.
Hetihlai hian state PWD-in a enkawl lailawk huamchhungah hian tun dinhmunah chuan lirthei tlan that theih turin a khuar hnawh mek a ni rih a, black topping tihna tur sum ruahman tel ala ni lo tih thu dawn a ni. Sum hi PWD chuan state sawrkarah an dil leh mek tih thu dawn a ni.
Black topping a nih loh chuan, lung leh lungthila hnawhkhaha chil mam ringawt hi chu, ruahtui tlak tam tak tak hunah lirthei lian ritphurin an rah reng chuan chhe leh thuai thei dinhmunah a ding nia ngaih a ni.
Inrinni khan BJP Mizoram chuan helai kawngpui thawmthat mek hi an tlawh a. Tun thlenga kawng thawmthat hleihtheih loha ala awm reng chhan chu state sawrkarin monitoring a tih that loh vang ni ah an ngai tih an sawi. “Thal laiin kawngpui siamthatna hun kan nei a. Kan ei leh in lakluhna pui ber ni si, state sawrkarin a monitor pui miah lo tihna a ni. Tunhnaiah truck neitu leh khalhtu pawlte auchhuak lo se, thawmthat hna hi an thawh mai a rinawm loh a. PWD minister pawh khan a tlawh a rinawm loh,” BJP State president Vanlalhmuaka chuan a ti.
Mizoram sawrkar chuan kawngpui thawmthatna tur hian sum a awm tih sawi reng siin, an thawk chak lo hle thung nia an hmuh thu a sawi a. Thildang atan sawrkarin sum a puk reng tho a, kan ‘lifeline’ siamthatna atan hian cheng vaibelchhe 10 pawh puk se, tha taka an thawmthat theih a ring tih a sawi.
Kawng thawmthat mek chungchangah state sawrkar chuan kartin ‘monitoring’ a tih ngai nia a hmuh thu BJP Mizoram hruaitu hian a sawi a. “Chuti lo chuan a tha mai loang,” a ti. A tul angin State BJP chuan sawrkar laipuia hma lakpui ngaihnaah, thangthat la ve dawn lo mah se, puih an inhuam tih a sawi a ni.
Vairengte to Sairang four lane siam turah kum 2020 atangin sawrkar laipui chuan hma la tan tura a remtih sak tawh laiin, state Forest department atanga forest clearance lamah harsatna siamsakna a awm reng avangin he buaina hi ala awm ta reng niin a sawi bawk.
BJP State Core Group member DR K Beichhua, MLA pawhin inkalpawhna kawng pawimawh, kan ei leh bar lakluhna bul ber tha lo leh thal lai pawha truck khalhtute nawrh ngai khawpa ngaihsak loh a ni chu state sawrkar mawhphurhna a ni, tiin, tuna kawngpui thawmthat dan en chuan, furpui thlen hmaa kawng an hnawhna hi a chhiat leh hman mai a hlauhawm tih a sawi a. Mizoram sawrkar chu heti lo deuha kawngpui hi thawmthat hna thawk turin a ngen tih a sawi.
“He kawngpui chhe lai bik siamna atana sawrkar sum dah hi cheng vaibelchhe 1.25 a ni a, rintlaka kawngpui hi a siam theih dawn loh avangin sawrkar hian ngaihtuahna seng nawn leh a, kawng daih rei zawk, kum 15 daih em em ni lo mah se, fur harsat zual lai thleng tala tha tura kawng siamna sum MPWD hi ruahman sak turin kan ngen a ni,” a ti.