Kawngpui chhia buaipui lai mekinruahsur nasa in chhiatna thlen belh

Kawnpui leh Sairang inkar kawngpui chhia avanga mipui mamawh phur lirthei an tlan theih loh avanga nunphung buai thu sawi a nih mek laiin, ruahsur nasa in helai kawng bakah hmun hrang hrangah chhiatna a thlen belh a, mi pakhatin nunna a chan.

National Highway 306 Kawnpui to Sairang inkar siamthat a la nih loh vangin mipui mamawh lirthei lian an la tlan tha thei lo zel a. Lirthei lian intelkhawmna pawl hrang hrangin lungawiloh an lantir tawh hnu ah July 18 atang khan Mizoram Oil Tanker Driver Association (MOTDA) pawhin kawng hi tlan theiha siam pangngai a nih hma chuan tlan rih loh an tum tih an sawi a. Kawng tha taka siam nghal an beisei loa, chetsual hlauhawm loh tawka siam chu an beisei thung tih an sawi a ni.
Hei vang hian Mizoramah petrol leh diesel lut a tam lo nghal a, July 18 (Zirtawpni) zan atangin July 20 (Pathianni) thleng khan filling station ho an lun hle a, thenkhat chuan sawrkar dan angin an oil neih hi an khuahkhirh tan tawh tih thu dawn a ni.
Kawngpui chhia avang hian Mizoram Truck Owners’ Association leh Mizoram Truck Driver’s Association chuan truck tam tak chu kawng chhiat vangin an tlan tha ngam loa, an chawl rih mek tih an lo sawi tawh a. Gauhati High Court lamah public interest litigation (PIL) thehlutin, High Court hian ngaihtuah zui tlakah ngaiin a lo pawm tawh nghe nghe a ni.
Hetihlai hian Inrinnia ruahsur nasa chuan Mizoram hmun hrang hrangah harsatna a thlen belh a. Mamit district-ah leimin a tam ber a, NH 108(44A) chu lirthei eng chi mah a kaltlang theilo.
Thudawn danin, Mamit leh Tuidam inkarah hmun 12-ah leimin a awm, lirthei eng chi mah a tlan tlang theih loh avangin khualzin leh damlohna avanga hmunpui pan ngaiten harsatna an tawk a. Dapchhuah bul W. Phaileng peng chhak, Dampui lamah kawng bal a awm tih sawi a ni.
He chanchin buatsaih lai hian Mamit khawpui hi Bairabi kawng atang chiahin a tlawh pawh theih tih sawi a ni a. PWD-in kawng tih tlang tumin theihtawp an chhuah zui nghal a ni.
Inrinni zan ruahsur nasaah khan Sairang Dinthar huamchhung, Zawngte lui kama stone quarry a min a, a bulhnaia awm mi pakhat a thi.
Thudawn danin, Inrinni zan atanga ruah sur nasaah khan, July 20 - Pathianni zing dar 1.00 vel khan quarry hi a min a, he quarry-a thawk, a bulhnai ina riahchilhtu Rotluanga (40), Hortoki chu a in chawp hian hnawl telin, Pathianni chawhnu dar 1.00 vel khan a ruang hi haichhuah a ni.