Kawngpui chhia vangin Chawngteah kawng zawh

Chawngtea cheng Mizo leh Chakma tlawmngai pawl hrang hrang intelkhawm chuan an khawchhung kawngpui chhiat avanga lungawi lohna lantirin Thawhtanni khan kawng an zawh.
Kawng hi Chawngte football ground atangin SDO office thleng an zawh a, pawl hrang hrang aiawhten thu an sawi. Chawngte chu kawng hrang hranga ngaithah a nih thu te, kawngpui chungchangah an chan tur leh a nih dan tur ang an nih phak loh fo thin thu te, state sawrkarin an dinhmun harsat zia hria in ngaihsak se an duh thu te, an khawtlang thatna tura hmalaknaah NGO chauh niloin Chakma Autonomous District Council sawrkar pawhin theihtawp chhuah se an duh thu leh kawng siamtha tur hian CADC-in hma a la tawk lo nia an hriat thu te an sawi a. Kawngzawhah hian mipui chuan sawrkarin kawng chhia a siam lo a nih chuan MLA inthlan thlenga a nghawng tur thu aupuiin, “No road, no vote, no election” tih thuziakte an keng a ni.
Chawngte all NGO chuan Chawngte SDO (Civil) kaltlangin state sawrkar hnenah memorandum an thehlut a. An memorandum ah hian kawngpui chhiat avanga Chawngte mipui harsatna tawh mek tarlangin, school leh college zirlaiten nitin zirna in an pannaah harsatna an tawk reng a, chhungkaw hrang hrang eizawnna leh lirthei hmanga eizawngte pawhin harsatna an tawk a, state sawrkar leh ADC sawrkarin chak takin hma la se an duh tih an sawi a ni.