Kawngpui laih chungchangah CYMA leh NHIDCL inkawm

Mizorama NHIDCL (National Highways & Infrastructure Development Corporation Limited) hnuaia kawngpui laih mek leh harsatna awmte sawiin Central YMA hruaitute chuan Nilaini khan NHIDCL hotu an kawm.
Central YMA hruaitute hian Sub- Hqrs YMA hrang hrang hruaituten an huamchhung theuha NHIDCL hnuaia kawng laih meka harsatna an neih chu an sawipui a. Aizawl- Tuipang Road a Khumtung leh Serchhip inkar kawng siam tha lo leh side drain siam tha lo; Lunglei- Tlabung inkar kawng siam mek chak zawka hma lak tul thu; Saitual- Saichal Road (NH102 B diversion) a leivung paih fimkhur loh vanga harsatna awm leh leivung paihna tur (spoil bank) ah chauh leivung paih tura tihna; Kawnpui- Kolasib inkara NHIDCL enkawl kawng siamthat chungchang leh hmun hrang hranga kawngpui laih mekte an sawipui.
NHIDCL executive director Virender Kumar Jakhar chuan kawngpui laih mek leh dinhmun a lo hrilhfiah a. Spoil bank niloa leivung paih chu enfiaha hma lak zui a tum thu, Lunglei- Tlabung inkar kawngpui chu kumin December-ah chuan zawh deuh vek a nih tawh tur thu leh Saitual – Saichal inkar kawng leh hmundanga an hmalakna a sawi a. Central YMA chu puibawm turin a ngen nghal.
Central YMA hruaitute chuan Mizoramin kawngpui tha a neihna tura hnathawh kal mek chu tluang taka a kal zel theihnan contractor-te pawh puih an inhuam tih an sawi a. Chutihrualin dan ang thlapa hna thawh a nih theihna’n leh tha leh tlo ngei tura hna thawk a, leivung paihna tur pawh a paihna tur ngeiah paih a nih zel theihnan NHIDCL hotuten contractor te hnathawh enpui zel turin an chah.