KAWNGPUI THAR SIAM BELH TAWH LO MAI ANG U !!

By RH Lalherliana
India rama kan khawpui ber, Delhi chuan hma a sawn nasa hle tih kan sawi thin a; Delhi sawrkar kan awhzia pawh kan tarlang nasa. Hmun zawl leh hmunhma rema awm ni si, inkalpawhna kawngpui an siam dan khuan ngaihtuah a tithui hle. Kawng zal nuam tak leh ngil taka siam theihna tura ka ngaihah te khan a chang leh leihnuaiah kan lut a, a chang leh Lei (Bridge) sang taka siamah kan tlan leh ang lawi a; ramngaw zau tak te min tlan hual tir leh reuh a, kawng siam nan sum an seng thlawn tam mang e aw tih min ngaihtuahtir nasa hle.
Mahse kawng an lo kal kawi, chhuk chhohtir te khuan awmzia leh chhan tha tak a lo nei a, sum sen tam pawh an lo huam kha a awm tihna chen ka neih phah ta zawk a; Mizoram-ah pawh hian ti ve thei ila tih ka duh hle rualin kan la ngaihthah viau bawk si. Kan thangharh thei dawn lo a nih chuan kei chuan Kawngpui thar siam belh hi ka duh tawh lo, tuna kan neihsa hi a tawk tawh rih viau a ni.
Ram changkang leh hmathlir nei thiam chuan Development pawh Environment chhe lo thei ang ber turin hma an la tawh a; an kawng siam chhuk chho te khu ramsa/rannung (Wild animal) te chenna tihchhiat leh tihzimsak an nih lohna tura an lo ruahman a ni. Kan ram chhung ngeia sawrkar laipuiin Rel kawng a siam mek pawh hi han en ila, Ramsa awmna tihzim a nih lohna turin Lei (Bridge) leh Leiverh lem (Animal Corridor) te an siam chuk reng a ni.
Hetih lai hian kan State Sawrkar-in hmasawnna tia a sawi zinga pakhat inkalpawhna kawngpui kan siam dan hi han thlir ve leh ta ila, a lungawi thlak loh. Kawngpui thar siam hmangin kan ram chhunga cheng ve ramsate awmna kan then darh a, lehlam lehlamah kawngpui thar siamin kan hual chep a, kal ngaihna an hriat loh avangin hmun zim te an luah a ngaih phah a; chung an ram luahah te chuan ramvak leh sa pel ten kan luh chhuah a, tlanchhiatna an neih loh avangin kan hual zim zel a, kan suat nasa tawhin, State Birds phei chu hmuh tur a vang tawh hle a nih hi maw.
State sawrkar-in ruahmanna tha tak neia kawngpui thar a siam ve te pawh hi han thlir ila, Leivung paihna tur a ruahman tel thin loh avangin Link road kan laih leh kawngpui thar kan siam te chuan kan lui te a hnawh ping zova; heng lui leh ramngaw kan tih chereu zozaite siam tha leh tur hian cheng engzat nge sen ngai tawh ang le?!!
Ram changkang zawk ten Environment tichhe lo thei ang ber tura hmasawnna an kalpui ang hi kan ti ve thei lo a nih rau rau chuan Kawngpui thar siam belh te, Building thar sak belh te, Khelmual siam belh leh ramngaw thiat zawnga hmasawnna hna thawh hi ti tawh lo mai teh ang u.
Hmasawnna khingbai tak hmanga inkalpawhna tha leh Building tha pui pui, a chhunga thil nung chenna tlak lova kan ram hi chhuah a nih ai chuan, kan chhuan lo kal zel tur te tana chen zelna tlak, ke-a kal ngai pawh nise a hlu zawk fe ngei ang.