Kum tling lo vaihlo hmang 58% hi…

National Tobacco Control Programme-in a tarlan danin Mizoramah kum 13 atanga 15 inkar zingah vaihlo atanga siam engemaw ber ti thin za zelah 58 an awm, tih a ni a. An zinga za zela 20 te chuan an sim theih thu an sawi a.
Mizoram hi state ralmuang tia hriat leh sawi hlawh a ni a, state danga silai kenga hel pawl ang hi Mizoram hian awm lem lo mah se, a lehlamah kan dinhmun hi a ralmuang ta lo a ni.
Mizoram hian a chhe lamah record sang tak tak neihna kan ngah ta hle a. HIV/AIDS hluarna ber a ni a. Ruihhlo ni se, ni tin cheng vaibelchhe tam tak hu heroin man chhuah ruih ruih reng a ni a. Corruption ni se, kohhran leh pawl zawng zawngin an do rawn luai luai ngai khawpa hluar a ni a. Natna lamah lah Cancer tamna state a ni a. Vaihlo, zuk leh hmuam ti nasa ber state kan ni bawk a. Tunah phei chuan kumtling lo a kangkai leh mek a, 58% zetin vaihlo an hmang a ni tawh a. Development lamah ni se, NGO hrang hrang thawhpui luai luai ngai khawpin hna a chhia a. Economic dinhmunah lah han chapopui tur a awm bawk si lo. Thiam zirna lamah ni se, state dangte hnungah kan awm reng ni maiin a lang bawk. The most peaceful state hi a ‘peaceful’ dan a fuh lo hle niin a lang.
Vaihlo bik han thlurbing ila; kumtling lo heti zatin zuk hmuam an lo ching hman reng mai hi alarm khawnrikna tur niin a lang. Kumtling lo kan tih hian, zirlai deuh vek an ni dawn tihna a ni a, heti zat zatin vaihlo an lo hmang reng mai hi, school education department lamin beihpui an thlak a ngai ta niin a lang. Thla khat chhunga vaihlo zial lei nana hmanral cheng nuai 900 chuang zingah hian kumtlinglo ten zial mana an senso thahnem tak a tel dawn tihna a ni a. Vaihlo tih chingte chuan thildang ruih theih pawh tih an awlsam dawn tih a lang nghal a, kan dinhmun hi a duhawm lo hle a, a ram luahtu ber mihringte kan nikhua loh chuan ramin awmzia a nei dawn lo tihna a ni a, tanlak kan ngai hle a ni.