Kawngpui thawmtha turin NHIDCL hotute hrilh an ni – Lalruatkima

Kolasib district paltlangtu national highway rang taka thawmthat a nih theih nan a enkawltu NHIDCL hotute ngun taka hrilh an ni tawh tih minister Lalruatkima chuan a sawi.
Joint YMA Field Vairengtea phul lem phah Nilainia a hawnnaah Rural Development minister Lalruatkima hian hei hi a sawi a. Harstana hrang hrang paltlang tura khawtlang, kohhran leh tlawmngai pawl tanrual a pawimawh tih a sawi a. Infiamna lama hmasawnna bakah rel hmanga inkalpawhna tha awm tura hma lak a nih bakah tuialhthei leh eirawngbawlna gas hnianghnar zawk chhekkhawl a nih theihnan ruahman a nih thu te, buhfai dahkhawlna tur FCI kudam sak mek a nih thu leh, lirthei hmanga inkalpawhna tha 4-lane siamna tur hna pawh tan thuai beisei a nih thu te a sawi.
Mizo thalaiten hriselna leh infiamna kawnga hmasawnna an hmuh theih nan Sports department hmalakna fakawm a tih thu sawiin, Vairengte infiammite tana phullem phah tharna khelmual changtlung tak hawn a ni chu lawmawm a tih thu a sawi.
Joint YMA Field Vairengtea phullem phahna hi Special Assistance to State for Capital Investment (SASCI) hnuaia cheng nuai 600 hmanga hmalakna a ni a. Hna hi kumin April 5-a thawh tan niin August 23 khan zawh a ni.