Kawnpui-Khamrang kawngpui siamtha tura tih court-in a khak

Kawnpui-Khamrang kawngpui
siamtha tura tih court-in a khak
Kawnpui leh Khamrang inkar kawng siamtha tura tih contractor chu Gauhati High Court-a inlan hun tura tihah a inlan loh avangin court hian na takin a khak.
Vairengte leh Sairang inkar kawng chhia chungchangah hian Mizoram Truck Drivers’ Association chuan Gauhati High Court Aizawl Bench-ah public interest litigation (PIL) a thehlut a. Court-in a ngaihtuah meknaah November 6 khan Court hian Gauhati High Court chief justice Ashutosh Kumar leh Justice Michael Zothankhuma te thutna bench chuan a ngaihtuah leh a ni.
Supreme Court advocate -on- record JC Lalnunsanga tarlan danin, 2025 October 24-a court thuchhuak angin NHIDCL-in insawifiahna a thehluhah Kawnpui leh Khamrang inkar hi kumin July khan Mizoram PWD kut atangin an la a; Bilkhawthlir -Kolasib, Kawnpui -Khamrang leh Buichali -Sairang inkar chu siamthat hna lo thawk lailawk (short term maintenance work) turin M/s J Infratech Ltd chu kumin June 4 khan a ti a. He hna lo thawk lailawk tura work order hi kumin July 7 khan tihchhuah a ni.
NHIDCL leh J Infratech Ltd hi kawng khuar hnawhkhah, leimin leh tuiliankawr thenfai, lungrem leh a dangte siam hna thawk tura tih an ni a. Ruahsur nasa leh lirthei veivak tam avangin hna thawh chak theih a ni lo tih court hi an hrilh tih a sawi.
M/s J Infratech Ltd hi court-a inlan tura hriattir ni mah se, an inlan loa; court hian a lungawiloh thu sawiin, M/s J Infratech Ltd hnanthawh chin bakah an hnathawh thlalak kimchang nen affidavit hmanga court hriattir turin a ti tih advocate JC Lalnunsanga hian a sawi. ‘Court-a an inlan lo nawn a nih chuan, he kawngpui hi Mizoram tan a pawimawh em avangin, court-a inlan rang turin man phalna – ‘warrant of arrest’ chhuah thlengin a ngai dawn tih court hian a sawi,’ a ti.
He case hi kumin November 25 hian ngaihtuah leh tura tih a ni.