Kawnpui – Sairang kawng siamtute kar khat chhunga siamtha turin chah

Kawnpui – Sairang kawng siamtute
kar khat chhunga siamtha turin chah
Kawnpui to Sairang kawng, a bikin Buichali lei bula metree 300 vel kawng chhe zual chu kar khat chhunga lirthei lian tana zawh hrehawm loa siamtha hman turin a siamtute chu Home minister K Sapdanga’n a chah a, kar khat hnu hian a tlawh leh dawn tih a hrilh.
Home minister hian Inrinni khan helai kawng chhia, a bikin truck-a eizawngte leh Mizoram mamawh phurluttute tana harsatna siam rengtu hi a hmunah a enfiah a. Kawng chhe zual deuh hmun li vela awm chu en bikin, a siamtu NHIDCL leh an hnuaia contractor-te chu tun thlenga kawng chhia siamthat a nih loh chhan a zawt a. Siamtha tura an harsatna leh mamawh a zawt bawk.
Kawng chhiat zuala hmun thum chu harsa lo taka siamthat mai theih nia a lan thu an sawi a. Buichali lei bula metre 300 vela thui kawng chhia, chirh leh khuar nasa tak awm chu, khua a that chuan ni hnih thum chhunga an zawh mai theih thu an sawi a. Home minister hian ruah hul hun nghah theih a ni tawh loa, ruah sur mah se, lirthei lian tana tlan hrehawm loa siam ran a ngai, tiin, Thawhtanni (May 26) atanga theih ang anga thawk tan turin a chah a. Tluang taka hna an thawh theihnan lirthei tlan dan tihdanglam hret dan tur pawh duanpuiin, “Kar khat hnu (Inrinni – May 31) ah ka rawn en leh ang,” tiin a hrilh.
Home minister hian state PWD-in a thawmthat hna an thawh, Khamrang lam pawh enin, sum remchang ang pawtkhawm phawt a, hna thawh a, a siamna tur sawrkar laipuia dil mek, an la rawn pekchhuah loh chu a lo thlen hunah an lo hman batna hi rulh leh mai dan dap turin a kaihhnawih department hotute a chah.
NHIDCL hotute chuan Kawnpui leh Khamrang inkar kawng siamtha turin tender an chhuah tawh a, sum sanction an la dawn loh avangin hma an la thei lo niin an insawi a. Mizoram PWD hotute pawhin tuna Ministry of Road Transport & Highways secretary awm thar chuan sum hi chhan sawi tur awm si loin a hup bet rih tlat niin an sawi ve bawk.
Home minister hi Kolasib bialtu MLA, deputy speaker Lalfamkima, Tuirial bialtu MLA K Laldawngliana, PWD commissioner & secretary K Lalthawmmawia, PWD engineer in chief H Zoramliana leh a kaihhnawih sawrkar hotu dangte bakah Central YMA leh MZP Gen. Hqrs. hruaituten an tawiawm a. Kolasib district chinah bawrhsap Robert C Lalhmangaiha hoin district thuneituten an lo dawngsawng ve bawk.
Home minister hoa thuneitute thukhawm chuan:
8 Tun dinhmuna kawng chhe nasa zual lai bik, Sairang leh Buichali lei inkar chu ruahsur loh hun nghak kher loa a rang lama siam nise; chak taka hna thawh a nih theihnan kawng hi lane khat siam hna kal hmasak tir nise, hnathawh lohna lam zawkah chhun lamah Silchar lam pan lirthei ruak kaltir a, zan lamah Aizawl lam pan lirthei rit phur kaltir nise tih a ni.
8 Hnathawh tibuai lo turin kawng dan a ngai dawn a; helai kawng siam hna hi NHIDCL leh PWD bakah Police-in an vilpui anga, Khamrang leh a chhehvela YMA branch te tlawmngai tura sawm nise tih a ni.
8 NHIDCL leh contractor-ten nitina an hmalakna chin chu Kolasib bawrhsap hnenah an report thin anga, PWD-in nitin enfiah turin anmahni mi leh sa an tir ang.