Kawrpuichhuah kaltlanga lei dawh tum ruangam fuh tawk lo siamtha leh mek

Kawrpuichhuah kaltlanga lei dawh tum
ruangam fuh tawk lo siamtha leh mek
Kawrpuichhuah Integrated Check Post-in a kentel, inkalpawhna lei dawh kai tur chu a ruangam duan danah tih fuh tawk loh a awm vangin tih that leh mek a ni tih Home minister Lalchamliana chuan a sawi.
Zan khat riaka Tlabung tlawhtu Home minister hian Zirtawpni zing khan Kawrpuichhuah a tlawh a, dan anga Kawrpuichhuah kaltlanga India leh Bangladesh insumdawntawn theihna tura ruahmanna tipuitling turin, ram pahnihin inremna an siam zulzuia hma lak zel a ngaih thu leh ruahmanna tipuitling turin Mizoram sawrkarin theihtawp a chhuah zel thu sawiin, chief minister Pu Zoramthanga bakah Commerce & Industries minister Dr R Lalthangliana te pawh tum engemawzat Bangladesh-ah an kal tawh a; Bangladesh lam atangin an Commerce minister Tipu Munshi leh official dangten Kawrpuichhuah an tlawh tawh tih a sawi.
Kawrpuichhuah Integrated Check Post-in a ken tel, inkalpawhna lei dawh kai tur chu a ruangam duan danah tih fuh tawk loh a awm vanga tih that leh mek a nih thu leh, ruahman ang chuan state Home department pawhin Immigration Check Post bun an tum thu a sawi a. ICP chu a nih dan tur ang a nih hunah, ramri bula awmten nasa taka an chhawr tur thu leh eizawnna remchang zau taka a inhawn tur thu a sawi a ni.
Remna leh muanna a awm loh chuan hmasawnna in a tuar phah tih Home minister hian sawiin, Bangladesh ram lama chengte nen inlaichinna tha tak neih tum turin, ramri bulhnai mipui a chah.
15th Finance Commission-in India ram puma Fire Station tihchangtlunna tura sum a ruahman cheng vaibelchhe 1500 atangin, Lunglei district bik tan cheng vaibelchhe 4 dah a nih thu leh, hemi hmang hian Tlabunga Fire Station pawh tuamtel a nih tur thu a sawi bawk.