KEI CHU MAW! (Ràwl lai kan nun)

JC.Zoremi Hmar Joute

Ka tleirawl lai (Han ti ve khanglang ila) chuan Pasi pawh thelh khaw khen hnan niawm tak, cher fip feng fawng, nachhawkna heh hmel deuh mai hi ka ni a. A tawn mar mamtu tisa awm mang ta lo chu kan vun te pawh laiking chhoh zut ang hruih hi kan ni mai a. Hmul phurh tha lo mah se hmel tal tha se a zia deuh tur; ka vanduai a tluang a, Bâk chhem ang nung mai, chawhmeh hing hawp fuh palh hlauh hmel hi kan pu leh roh bawk si a. A keu te tal keu ve ila ka duh em em laia bel mang ang chauha rawng dumno ka kai rual leh si hian beidawn a va tizual tehlul em!
Kan inhnawih pawt ve deuh leh, kawngpui atta thlauh hnan hi kan ang a; inhnawih lo ila nau tap thlem nan min hmang leh roh thin bawk si. Sam kan pawh ngil leeehh…Er. Sanglura i ang min tia; han tikir ila thlawh loh bapui hmun i chhipchuan a ni ngawt alawm min ti leh a. Kawr rawng lar lampang hain han inchei vul deuh ila, chhul tha lo emaw min ti a, inchei lem lo va kan awm mai mai lahin sa ka sat thin emaw an ti bawk si; Ka lu-a invuah tlat ka hmel hi ka dam chhung chuan ka pu ngar ngar mai dawn a ni si a, a hrehawm teh tak e!
Kan han nula ve ek ek a, lu chauh lovah hmul a lo to ve tan a. (Ngaih kawih loh tur, zak hmul sawina aw…) =hiante nena awm ho changa kan titi duh zawng te, kan nuih ‘diaarrhh’ danah te nu leh pa ten kah rai kher ngai lovin kan tum phawt chuan kan rai ve thei tawh tih an lo hai bik lo va. An lo tawn tawh hnu, fing bera inngai, la fing ziktluak si lo tleitir lungmawl hun kan tawng ve mek tih an hria a, ven lah min veng narawh e. Ho lam te te-a nu leh pa bum dan pawh traning hranpa ngai miah lo hian kan pianpui B.A pui hmiah hmiah a.
Dawt var atanga rawng hrang hrang sawiin multi colour hlir mai kha a thlun phelh ang par parin kan chham thei thin kha a ni a. =hiante chhungte dam lo thei riau mai te, kan thiante ngei pawh vawk in bula an tluk hlum lek lek chang kha a awm fo mai a. Keimahni ngei pawhin awih harsa kan tih chhuanlam thenkhat kha kan nu leh pa te khan an awih vang pawh ni lem lo khan min pawm liam sak vel mai mai fo khan ka hre thin. Ka thiante hnenah lah chuan, ‘perezen of dâwt’ tur ngaihtuah chhuak zung zung thei lo chu nupui atan in tlak lo ang” te kha ka ti ang zuah zuah a!
Nu leh pa strict luatah a lamtual chil lo zawng khan ka khawsak phah roh a, tlangvalin min han biak lumlam deuh pawhin lei chhuah zoh zoh chungin kan ba ru nuih vur vur ringawt! Kawnga kan han kal ve te lah kha khup tuah ni chiah si lo khan mahni keartui kan chhuih ang khut khut ah; min hre chiang lo tana mi chawhnu lam deuh anga ngaih theih tur kan nih laiin min hre chiangtute tan pawh kohhran bel tlat tura an duhsak tur chi, YMA leh tlawmngai pawl hrang hranga a tangkai pawl nih duh hmel deuh kha kan ni ve tlat a ni.
Min ben thak thak paha hmai chhanah kan fel thu min hrilh chat chat ngam tawh hi chuan a lawmawm dan a dang deuh ahh, kan hnung lam mai ni lo, kan hma lam thlenga kan entawn tlakzia an sawi lauh lauh tawh phei hi chuan ‘dar ben’ rim hi a nam faih faih tawh tihna a ni. Lawm huam tur a ni lo tih hre ve kur chung siin a mawiah kan han nui vei sang lo thei thin si lo ahh, kan nawi hmel zual ngawih ngawih mai a ni!
Miin min koh zawih deuh leh kan hawi hu hu a, min koh rin leh kan phu zuk lawi a. Han titi tui deuh ila dar vei lam kan san uk uk a; khua hi a var lo a ni. A zirna lamah lah hei, PL.Liandinga te ho zik zek vangin zirlaibu phenah thawnthu bu kan thukru tluan thak a! Lawr pawh kan pasi lo lek lek mai si a. ‘A enga tia Pu PL-a chu puh daih nge maw i nih le?!’ in ti mai thei; puh lo thei ka ni lo reng reng! Ani chauh lo pawh, khang hun laia lehkhabu chhuah thin te, Cowboy bu letling thin ho kha chuan ka chut deuh chungchangah hian thuk takin mawh an phur tlat a ni.
Ngopa khaw daifemah, vawkchaw so bawrh bawrh bak thawm dang awm meuh lohna hmunah Laltin eng chaurau zet hnuaia London khawpui sualna hrang hrang min chhuipui rup rup thintu kha Pu PL-a hi a ni tlat a, a rau chan chhah zual lai phei chuan kan vawk in te kha sakawr tawlailir ang deuh te’n kan han hmu deuh rum rum ahh, fur lai a nih leh kan veng kawngpui phei diak laiah sakawr tawlailir ke hniak kan zawng rilru du du ahh, kawmchhak pitar leh Mrs.Hudson an inan loh dan tur mai mai ngaihtuah te khan zan kan mu fo a nia. Ka ti tak tak!
Sherlock Holmes kuaite mitthla tlat chunga ‘bahadur larka’ tih vel thiam bel a har dan tur chu amah Pu PL-a pawh hian a hriatthiam ka ring. Ruah a sur apianga Baker street kawng diak velin a lunglen ve ngawt thin tan kha chuan result tha neih kha har ve tiu teu tak a nia. Uaini Kawla ka star ruala Sudden-a nupui nih thlamuanthlak turzia te kha aw! Pu C.Rokhuma a taka hmuh ka chak tluk zeta a lehkhabu fing ka tih thin Dr.PC.Biaksiama chu ka hmu ta nghe nghe a. Hmuhnawmna hranpa lutuk chu a lo nei chuang lo; hmai phih tur a neih ve nual leh, a fai vei par avanga a phih ve fo ka rinna bak han sawi vak tur ka hre lo na a, ka mi ngaihsan a nih avangin hmuh nuam ka tiin ka lawm hle.
Zir sang lo leh ram fang zau ve hman lo ta chu; thiante nena han titi nikhua pawhin kan thu hi a satel lu ru tlat thin a. A khabe sep thiam zualte titi kotlangah an kam liam ngaithlain kan lo hnapkhawn pachang hmu nuih ve tak hûrh hûrh a! An tawn chin leh kan chim chin a inthlauh thin em avanga sawi tur haihchhama kan lo ui vawih thut tlawk tlawk tak chang lah bo lo. Tuipui ral ram tawng an chheh thui deuh phei chuan za lo deuh hian kan lo bengchhet nuih ve hui ahh, anmahni an nuih si loh phei chuan kan han inthlahrung leh rih a maw, a ngaihna a awm lo. Ram hnuk khawih phak ngei tur thil an sawi phei hi chuan kan lo phung tho hmu men ve run run ngawt thin a ni a.
Hmel leh pian, mize mawl eh uh lutuk zawng zawng nen, a val lem lo zawng hlira khawsa mihring fanu, dam sen ve luau bawk si ta chuhh, pasal tur chungthu-ah chhungte an phang ru riau tih ka hai bik miah lo va; hnem dan tur erawh ka hre bik lem hlei law. Chawngzawng fela fel ve chauh mah ni ila rawngbawlna anga ngaia min lainattu an la awm ve ngei beiseina ka nei tlat a. Ka beiseina hlawhtlinna tur erawh chuan mi nula aia ka beih nasat hret a ngai dawn a ni. =hiante zingah pawr fein ‘pasal pakhat leh thing phur khat te chu hmuh loh thu a awm bik lo chiang em mai a’ han ti ve pang pang thin mah ila; thing phur khat zawk chauh hi ka hmu kumkhua palh thei ve tho mai! Mahse hei, rawngbawlna anga ngaiin Chaltlang tlangvalin tlawmngaiin min nei ta hlauh mai le!