KEIMAHNI TAN NI LOVIN PATHIAN TANA CHHANDAM KAN NI ZAWK

By Rev. Dr. Ramengliana
Kristianten chhandamna kan tih fo hi kan mihring dinhmun, chhandamna changtu dinhmun atangin kan thlir tam a. Pathianin min tihsak – min ngaihdamna, min khawngaihna, min duhsakna, min hmangaihna, keimahni lama luang chhuak kan tuipui a. Mak kan ti a, min tihlim a, kan lawm a, kan sawi tawp thei lo a ni ber a. Amaherawhchu, Chhandamtu Pathian chuan min chhandamnaah chuan eng nge a tum, eng nge a beisei, eng nge min chhandam chhan ber chu ni ta? tih zawhna chu kan chhut tam lo a ni mai thei. Chhandamnaah hian thih hnu vanram kai bak hi chu mamawh tam lovin kan inhre hialin a lang thin a ni.
Pathianin ama tan min chhandam
Kan hriat thiam dan tlangpuiah chuan Pathian hian keimahni thlarau malsawmna atan liau liau min chhandam niin kan hre thin a. A dik a, a dik kim lo a ni mai thei. A tawpkhawkah chuan Pathian hian ama tan, ama ropuina turin min chhandam mai a ni tih hriat a pawimawh hle mai. Keimahni min chhandamna aia sang zawk chu Ama tana min chhandamna hi niin a lang. America Pastor lar leh rintlak John Piper chuan, “Pathianin ama tan min chhandam a ni,” a ti mauh mai a. Ngaihtuahna a ti thui hle. He Pastor thusawi hi II Kor 5:15-a Tirhkoh Paula sawi nen a lo inrem em em zel bawk si nen: “…tichuan, a nungte chu anmahni tâna nung tawh lovin, an tâna thi-a tholeha tân an nun tawh zâwk nân, mi zawng zawng tân a thi a ni,” kan ngaihtuah chian chu a ngai a ni. Chhandamna duhawm tak hi mihring chhandamnaah i chhui tawp thin nge Chhandamtu thiltumah? Chumi i chhanna chuan i Kristian nun leh rawngbawlna thui tak a kawk dawn a ni.
Thilsiam atangin tan la
Pathian awm ring tha duh lo ho tana zawhna khirh tak pakhat chu “Eng vangin nge ‘thil’ hi a awm tlat?” tih hi a ni. Lei leh van hi eng vanga awm nge? Eng atana awm nge ni? tih zawhna hi a chhanna tur an nei ngang lo a ni. ‘Awm ve tawp,’ tih hi an chhan theih dan a ni mai a. Ringtu tan pawh he zawhna hi chhan a ngai tho. Eng vangin nge Pathianin mihring a siam? tih atanga tan a tul thin. Trinity Pathian kha famkim a nih avangin a ropui belhchhahna turin tu dang mah mamawh lo tur ni awm tak a ni a. Amaherawhchu, Pathian chatuan thiltum chuan Ama ta tur, Ama ropuina hmanrua tur siam a duh ta tlat a. Pathianin Amah hmangaih leh a thu zawmtu tur, Amah chawimawia leh chibai buktu tur a duh a ni, kan ti thei ang. Chutiang mi chu duhin lei leh van a siam a, mihring a siam a ni. Ama tan a ni phawt mai.
Mihring erawh a hlawhchham thin
Hlawhchham zawnga sawi chuan Pathian hi a hlawhchham ve fo emaw tih theih a ni. A duh ang mihring ‘amah hmangaiha a thu zawmtu tur, leh amah chawimawia chibai buktu tur’ siam tur hian a tang nasa hle a ni. Eden huanah chuan mihring hmasa pahnihte chu a dah ta a. Tih tur pawh a phut tlem khawp mai – inthlah pung tur leh huan enkawltu tur a ni mai a. Tih loh tur pakhat a tel tlat – huan laia mi thei ei loh tur a ni thung. Chutiang hringnun mawlmang takah pawh chuan mihring chuan a phatsan tih kan hria. Ngaihtuahna pangngai hmanga awlsam tak awmang taka lang pawh mihring chuan kan zo lo thin a ni. Pathian erawh chu a beidawng duh chuang lo va. Abrahama thisen atanga din thar a tum leh ta a. Sinai tlangah Thusawm Pek pein, dan tesep 600 chuang a pek bakah Lal, Puithiam leh Zawlneiin a thuam a, ‘khawizu leh hnute tui’ luanna ram Kananah a dah ta a nih chu. Mihring chuan a mihrinna a lantir leh tho. An hlawhchham chhiava a ni.
Mihring Fapa luhchilh rawngbawlna
Suangtuahnain thlir ta ila. Trinity-a minung pathumte chu an committee a, anmahni tana mi siam an tumna chu a hlawhchham zing ta hle mai a. Kal zel dan tur tha ber an rel ta a ni. Pathian Fapa chu a lo tawng chhuak a, “Eden huanah tih tur 2 leh tih loh tur 1 hrilhin kan dah a, an hlawhchham a. Kanan ram khawizu leh hnute tui luannaah Thusawm Pek leh dan tesep 600 chuang, bakah Lal, Puithiam leh Zawlneite nen lam kan pe bawk a, mahse an hlawhchham tho si a. Tunah chuan keimah hi anmahni anga piangin ka zu luhchilh ang a, an nih ang zawng zawng khu ka zu tawmpui vek ang a, an natna leh harsatna te khu ka zu luhchilh dawn a ni. Tichuan kan hlawhtling ang,” tiin rawtna a siam ta a. Trinity chuan chu chu pawmin Pathian Fapa chu a hming Immanuela, ‘kan hnena Pathian awm,’ niin mihring zingah a lo piang ta a ni. A mi atana a thlante chu an thil tih sual ata a chhandam dawn a ni.
Ama ta kan nih theih nan
Chutia Pathian Fapa mihring zinga lo cheng ta chuan ama ta tur bik hnam tin zing amite chu a chhandam ta a. A chhandamna kalkawng erawh chu a awlsam lo hle thung a. Pakhatna, Pathian thinurna chu a mite aiawhin a dawng ta a ni. Mihringina pawi tham lo anga kan ngaih sual te ber pawh hi Pathian chuan hrem lohvin a chhuah dawn lo va. Sual man chu thihna a ni tih a sawi chiang bawk si (Rom 6:23). Chuti a nih avang chuan ama mite tuar tur Pathian thin urna leih buaka awm zawng zawng chu Ama taksaah chuan a lo dawng ta a ni. Kalvari tlangah khan Pathian thinurna leih buakin a awm a, Pathian Fapa chu a mite leh Pathian inkara ban phara dingin chu thinurna rapthlak tak mai misual te lama leihbuaka awm chu a lo dawng ta a ni. “Ani chuan kan natna te chu a phur ngei a….”(ref. Isaia 53:3-7) tih a nih kha maw. Pahnihna, Krista zarah chuan Pathian mite chuan thinlung thar kan lo dawng ta bawk a. Thinlung thlak a nih loh chuan a ngai bawka tluk luh lehna a ni a. Dan siamin awmzia a nei lo. Chu chu hriain kan thinlung lung anga sak chu tisa anga nem thinlungin min thlaksak ta a ni. Chu thinlung thar avang chuan Pathian hmangaihna dik tak neiin, Pathin Thu zawm pawh nuam kan lo ti ta a (ref. Ez 36:26-28; Jer 32:40; Mk 14:24). Harsatna leh buaina karah pawh Pathian duh danin kan lo awm thei ta a ni. Pathumna, Pathian mite tan chuan engkim hian kan thatnain a thawk chhuak dawn a lo ni reng mai. Rom 8:28-ah, “Pathian hmangaihtu, ama ruat anga a kohte tân chuan, an ?hatna tûrin engkimin a thawhsak ?hîn tih kan hria,” tiin chiang takin kan hmu a ni. A tawp kan thlen hma chuan hriat thiam a har, mahse Pathian mite tan chuan he Pathian Thutiam hi innghahna tlak a ni. A mite tan chuan engkim hi a la fel vek dawn.
Pathian lam atangin thlir la
Chhandamna hi keimahni lam atana kan thlir chuan hmuh fuh loh tur tam tak te pawh a awm thei a ni awm e. Chhandamna bo theih leh bo theih loh thu ringawt pawh hi inhnial thui theih tak a ni. A eng zawng zawng pawhin rah duhawm lo tak a chhuah thei thin. Amaherawhchu, Pathian lam atanga thlir thiam chuan a ropuina leh a nih dan tur tak man thiam a awl dan te pawh a awm thin. Min chhandamna chu keimahni chen leh thatpui tur piah lamah Ama ropuina hmanrua atana min duhna a lo ni daih mai a. Ama tan min chhandamin, Ama ta kan nih hi chanvo ropui thei ber a lo ni daih si a nih hi.