Kendrick Lamar & SZA ‘Luther’ kar 13 a No.1 ta

Kendrick Lamar & SZA ‘Luther’ kar 13 a No.1 ta
Kendrick Lamar leh SZA hla hit ‘Luther’ chu Billboard Hot 100 (singles) chart-ah a No.1 a, he chart-ah hian a zawn zatin kar 13 a No.1 tling ta, Hot 100 chart history-ah kar 13 chin No.1 ni thei hla 15-na a ni. R&B legend mual liam tawh Luther Vandross puala a title an hmanna hla hi Lamar tan he chart-a a hla No.1 kai thei parukna niin, SZA tan pathumna a ni ve thung. Hetihrual hian Teddy Swims pawhin chart a lang rei record a rawn nihrual ve ta bawk.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni.
‘Luther’ hian kar khat chhungin radio airplay ngaithlatu maktaduai 63.4, stream maktaduai 18.3 leh sales 2,000 a la tlin thei a, hei hi a zawna kar 13 nan chart-ah a No.1 pui leh ta a ni.
‘Luther’ hian duet a he chart-a No.1 nih rei theih a pathumna record a rawn nihrual ta a, kar 16 No.1 ni thei Luis Fonsi & Daddy Yankee (feat. Justin Bieber) ‘Despacito’ leh kar 16 No.1 ni thei Mariah Carey leh Boyz II Men ‘One Sweet Day’ te chiah a pha lo a, Brandy & Monica ‘The Boy Is Mine’ a rawn nihrual ta a ni.
Alex Warren ‘Ordinary’ chu No.2-ah bawk awm lehin, chart No.1 hlui Lady Gaga leh Bruno Mars ‘Die With a Smile’ pawh No.3-ah bawk a la awm a, chart No.1 hlui, kar 19 No.1 ni thei, he chart-a No.1 ni rei thei ber record nihrualtu Shaboozey ‘A Bar Song (Tipsy)’ pawh No.4-ah bawk a la awm, Drake ‘Nokia’ pawh No.5 a la ni a, Morgan Wallen ‘I’m the Problem’ chu No.10 atangin No.6-ah a insawn ve thung.
Chart No.1 hlui Teddy Swims ‘Loose Control’ chu No.7 niin, he hla hi Hot 100 chart-ah kar 91 a lang tling ta a, Glass Animals ‘Heat Waves’ record nihrualin, Hot 100 chart-a lang rei ber a ni ve ta
a, ‘Lose Control’ hla hi Hot 100 top 10-ah kar 62 a lanna a ni ta a, he chart top 10-a lang rei thei ber record a siam a sawhnghet leh sauh e.
Chart No.2 pawh lo ni tawh Benson Boone ‘Beautiful Things’ pawh No.8 a la ni a, Chappell Roan ‘Pink Pony Club’ chu No.6 atangin No.9-ah a tawlh ve thung a, Doechii ‘Anxiety’ chu top 10 khartu, No.10 a ni.