Khamenei-a thih vanga buai theihna vil turin state-te chah
Khamenei-a thih vanga buai theihna vil turin state-te chah
US, Israel leh Iran inkara buaina chhuak chuan a tuam zau zel a, union home ministry chuan Middle East buaina kaihhnawiha India-a tharum thawhna thleng thei tur ngaihven turin state sorkarte a ngen.
Sorkar laipui hian inralrinna tur hi Iran Supreme Leader Ayatollah Ali Khamenei-a thah a nih hnua Jammu & Kashmir leh Uttar Pradesh-a Lucknow-a lungawi lohna lantir a nih hnuah a tichhuak a ni.
ANI-in a tar lan danin chuan MHA hian state sorkar zawng zawng hnenah fimkhurna tura tihna lehkha hi a tichhuak a, India rama sakhaw kaihhnawiha buaina awm thei laka fimkhur zual turin a ngen.
February 28-a thawn chhuah lehkhaah hian ram pawna thil thlengte hian ram chhungah ‘nghawng tha lo’ a nei thei tih ziah a ni tih news agency hian a tar lang a ni.
State sorkar thuneitute chu tual chhung mite zingah buaina emaw, khawtlang inkara buaina emaw thlen thei, ‘Iran thlawptu intibinga boruak chhia siam thei thu sawi’ awm theite chu enfiah leh hriat chhuah zel tum turin a ngen.
Home ministry-in inralrinna tur a tihchhuah hi Asia khawthlang lama buaina a nasat mek zel lai a ni a, a bik takin Khamenei-a thah a nih hnuah ram chhunga neuh neuh a awm lai a ni a. Inrinni khan US chuan Israel nen tanghova beihpui thlakin Iran khawpui leh sipai hmunhmate a bei a ni.
A chhan let nan Iran chuan beihpui a thlak ve nghal tih a puang a, Asia khawthlang puma US leh Israel hmunhma leh tanhmunte a bei a. He biala US sipai tam tak an awm avangin Gulf ram – UAE, Kuwait, Bahrain, Saudi Arabia, Oman leh a dangte chu drone leh missile hmangin a bei let ve nghal a ni.
India chuan buaina chhuak chungchangah hian political party zawng zawngte chu insum turin a ngen a, Gulf-a cheng mi tam tak telin a mipuite himna humhalh a pawimawh thu a sawi bawk.
Prime Minister Narendra Modi-a chuan Pathianni zan khan ram chhunga mi pawimawhte kokhawmin an thukhawm a. Asia khawthlang rama awm Indian-te himna tur ngaihtuah turin thuneitute a hriattir bawk.