Khaw 10 hriselna endik tawh

Khaw 10 hriselna endik tawh
Lungsen Aspirational Block huamchhunga Healthy Lunglei District Campaign kalpui mekah khaw 10-a mi cheng 481 hriselna dinhmun endik a ni tawh a, thisen sang leh zunthlum vei hmuhchhuah thar an awm nual.
Lunglei district bawrhsap pisa hmalaknaa RailTel Corporation of India Limited New Delhi atanga corporate social responsibility sum hmuh kaltlangin Healthy Lunglei District Campaign hnuaiah Lungsen Aspirational Block huamchhung khaw hrang hrangah inkaichhawn theih loh natna (non-communicable disease) chungchang inzirtir leh inentir runpui kalpui a ni a. Kumin May 9 khan tanin, Health & Family Welfare department-a doctor, nurse leh thawktu dangten khaw hrang hrangah kalchilhin thisensang leh zunthlum an endik bakah a mamawh hnenah a thlawnin damdawi sem a ni.
Zunthlum leh thisensang leh natna inkaichhawn theih loh dang laka inven dan tur leh nunphung hrisel nei thei tura thil pawimawh inzirtir thin a ni bawk.
Campaign hi May leh June chhung kalpui tura ruahman niin, thisensang leh zunthlum endik zat atan kum 30 chin chung lam mi 3000 aia tlem lo tinzawn a ni a. Khaw 10 – Lungsen, Zawlpui, New Vuakmual, Putlungasih, Kauchhuah, Phairuangchhuah, Belthei, Phairuangkai, Rotlang West leh Chhumkhum-ah health camp buatsaih tawh a ni. Heng khaw 10 atang hian mi 481 hriselna dinhmun endik a ni a. Thisensang (hypertension) tih hriat chhuah thar 23 leh inhre sa endik nawn 80 awmin, zunthlum (diabetes mellitus) hriat chhuah thar 27 leh inhre sa endik nawn 50 an awm a ni.