Khaw 16-ah rawng bawl

Lalpa Chhiahhlawh Intelkhawm chuan Hrangturzo bial khaw 16 ah tun thla chhung hian rawng an bawl.
Hemi chungchang thuchhuah an siamah khawtinah khawlaiah Pathian Lal Ram Chanchintha puangin Fangrual Tawngtai an nei a. Zanah inkawmkhawmna hmangin, inah tawngtai rawngbawlna an nei. Kumin Mizoram Assembly inthlanah Pathian lal ram sawrkar a din ngei a ngaih thu te, chumi atana mipui intithianghlim a, party politics tuinu bansan a hun thute an sawi. Pathian lal ram sawrkar din turin kohhran leh Mizoram People Forum duhdanin khawi khuaah mah member siam loin, unit leh block pawh din loin rawng an bawl tih a sawi.
Lalpa Chhiahhlawh Intelkhawm hian khawtinah hnehna aurual neiin, tawngtairual an nei zel a; damlo an tawngtai sak bawk. ‘Thlarau Thianghlim hnathawh ropui tak khawtinah kan hmu a, mipuiin party politics an lo kham tawh zia leh Pathian lal ram sawrkar din an nghahhlelh zia thu an sawi a ni,’ thuchhuah chuan a ti.