Khaw 3-ah thu awih lote in thiat

National Highway (NH) 54 kawngpui sial hna thawhnaah an chenna in a tihchhiat dawn avanga zangnadawmna pek tawh, an chenna in thiahna tur thupek ‘eviction notice’ pek tawh, la thiat duh lo leh insenghawi duh lo te in thiah chhunzawm zel a ni.
Lunglei district-ah hian Nilainia in thiahsak tawh bak khaw pahnihah chhungkaw pahnih in thiah leh hmabak a ni a. Nilaini khan thiah tum niin, Zobawk North-a Lalramnghaka chuan sawrkar thupek zawmin a chenna in hi amahin a lo thiat a, Dawn khuaa K. Lalengliani vawk farm pawh lo thiat mekin, thuneitu kalte hian an thiah chhunzawm sak a ni.
Siaha district-a NH-54 paltlang khua, Kawlchaw to Tuipang inkar kawngpui laih hna thawh meka zangnadawmna dawng tawh, an chenna in thiat duh lo chhungkaw 6 chu Siaha district bawrhsap VL Hruaizela Khiangte thupekin sub-divisional magistrate R Lalnunkimi leh executive magistrate J Lalhmahruaia te kaihhruaina in Thawhlehni khan khawl hmanga thiah sak an ni.
Theiri leh Tuipanga chhungkaw paruk hi thuneituten dan anga an chenna in thiat tura ‘eviction notice’ vawi 5 an pek tawh hnu ah pawh hmalakna engmah an neih loh avangin an chenna in hi thiahsak a ni.