Khaw lum vanga zirna in khar tumna awm rih lo

Mizoramah khua a lum mek a, India ram state thenkhatah zirna inte an khar laiin Mizoramah chuan khaw lum vanga zirna in khar tumna a awm rih lo.
School education department hotute chuan khaw lum vanga zirna in khar tumna emaw tan sikul tan hun sawn hma tumna emaw a awm rih lo a, khawchin leh zirlaite dinhmun an thlithlai reng tih an sawi.
“Khar tumna a awm rih lo a, zing lama sikul hawn tumna pawh a awm rih lo a. Mithiamte rawnin thil awmzia kan zir reng a, a tul dan ang zela hmalak a ni,” tiin education director Lalsangliana’n The Aizawl Post a hrilh.
“MIRSAC lam kan rawn a, state danga an buaina ang hi chu kan ni lovah ngaih a ni a. Warning eng emaw a awm a nih chuan anni’n an rawn sawi ang a, dinhmun hlauhthawnawmah kan awm te a nih chuan rang taka hmalak nghal a ni ang,” a ti bawk.
Khua hi lum mah se tuna Mizoram dinhmun hi zirna in kharna tur khawp a ni lovah ngaih a nih thu a sawi a, khawchin leh sik leh sa lama mithiamte ngaihdan an lak thu te, an rawn zel tur thu te a sawi.
April ni 18-ah education department hian khaw lum chungchangah hian sikul zawng zawngte zawm tur thurawn an chhuah a, khaw lum zual chhung chu oawn lama infiamna lam tih loh ni se tih te, class room leh hulhliap hnuaia hun hman tam ni se tih te, tui thianghlim in tam ni se tih te, ni sa hnuaia awm loh ni se, a theih chin chinah nihliap khum ni se tih te a ni.
Hetih lai hian Lai Autonomous District Council-ah chuan April ni 17 khan hriattirna an chhuah a, khaw lum vangin April ni 18 atangin sikul kal hun sawnin, zing dar 6 atanga dar 9 thleng sikul an kal.
State Meteorological Centre chhinchhiahnaa a lan danin, April ni 16 atanga ni 19 thleng khan Aizawl lum ber laiin ni tinin 33 degree Celsius a la kai ziah. Nikum April ni 28 leh 29 khan 32 degree Celsius a kai a, chumi hnuah April ni 16-19 chhungin a aia sang a kawk ta ziah.