Khaw lumin ram kan nasatna, France leh Spain tuam thar

Spain leh France-ah khaw lum uchuak tak a thleng leh mek a, hmun thenkhatah chuan 40°C pawh kai thei tur niin ram kang avanga an buainain zual lam a pan zel.
Spain-a weather service chuan khaw awm dan uchuak tak hian Pathianni ‘thleng vel’ a awh dawn niin an sawi lawk a, an ram chanchina ram kang nasa ber thelh mih tuma an beih mek laiin kangmei nasa tak chhuah theihna ‘a sang hle’ tih an sawi.
France chhimthlang lam, Gironde leh Landes region-ah pawh ‘yellow alert’ tihchhuah niin Nilaini kha a lum vanglai tur niin an sawi lawk a, hei hian Gironde-a ram kang thelh hna an thawh mek chu thunun thei turin ‘thil a tichiang lo zual’ tih an sawi.
Bordeaux mayor chuan chuan ‘eng pawh hmachhawn turin’ an inbuatsaih tih sawiin ram kang mek pakhat hian khawpui chhimthlang lam km 15 vel chauhva hla a thleng tawh a ni.
“A tul huna mi tam zawk insaseng theihna tur hmun kan buatsaih,” tiin Thomas Cazenave-a chuan a sawi.
France-ah hian ram kang vangin mi 2,20,000 insawn tawhin Spain-ah Madrid khawthlang lama ‘thunun theih rih loh’ ram kang vangin mi 1,00,000 an insaseng tawh bawk.
President Emmanuel Macron-a chuan Gironde region-a kangin a tihchhiatte a tlawh a, an ram chuan ‘beisei phak baka nasa ram kang’ an tuar a, ‘Indopui II-na hnu lama hun khirh ber’ a nih thu a sawi.
Macron-a chuan Landes region-a kang tenau deuh zawk chu an thunun tawh a, an thenawm, Gironde-a mi erawh tihmih tuma beih mek zel a ni tih a sawi.
Thawhtanni khan kang thelhtuten hma an sawn hret a; mahse, Macron-a chuan ‘khua a lum thar leh a, thli a la tam reng a, kan dawhtheih a ngai a ni’ tih a sawi.
A hmain Interior Minister Laurent Nuñez-a chuan kang hian ‘amahin nunna a nei’ tiin a sawi.
Bordeaux chhim lama Cestas Mayor Jerome Steffe-a chuan ‘kum zabi khat chhunga a nasat ber’ a nih thu a sawi a. Ni hnih liam taa an khua a kan kai atangin mi cheng 17,000 an inthiar chhuak tawh tih a sawi a. An region-ah hian hectare 42,000-a zau ram leh chena in 240 a kang chhe tawh.
Kang hi a hma angin a inman kai chak ta lo hret thung a, a team chuan ‘hnehna tenau’ an chang tih a sawi a. Hetih rual hian thli hawi zawng leh thil dang avangin a nasa leh thei tih a sawi.
“Kangmei chhuak thei vengin kan tihtheih ang zawng zawng kan ti a ni,” a ti.
French Prime Minister Sébastien Lecornu-a chuan an ramin ‘ram kang chhuah duh huna an beisei phak bak’ an tawng mek tih sawiin January atangin hectare 1,16,085-a zau a kang tawh a, kangmei 13,566 a chhuak tawh tih a sawi.
Minister chuan kang 10 zinga pakua chu ‘mihringin an tihchhuah, fimkhur loh rah a ni a. Sikret bung paih, barbecue, inveng lova hnathawh vang’ tih X-ah a tar lang.
Tihpalha chhuak vek a ni lo tih erawh a sawi a, July 6 atang khan kangmei chhuak kaihhnawihah mi 162 man an ni tawh tih a sawi.
Var leh Landes telin French region dangah pawh ram kang a awm mek a, Corsica thliarkara Haute-Corse-ah pawh a kang mek.
Hetih lai hian an thenawm, Spain-ah chuan an khawpui Madrid khawthlang lama ram kang avangin emergency puan chhunzawm zel a ni.
Thlalem atanga a lan dan chuan hectare 27,000 chuanga zau a kang tawh a. July 24 leh 26-a thlalak atang chuan ram kang hian ni hnih chhungin Almorox, Villa del Prado leh San Martín de Valdeiglesias a kang kai a, hmun khata insiamin nasa tak a ni tawh tih a lang.
Tual chhung thuneitute chuan an region chuan ‘an hriat china kang nasa ber’ a nih thu an sawi.
Sik leh sa inthlakin khawvel pum a tilum a, Europe hi khawmualpui lum chak ber a ni a. Hei hian nipui a tirei a, tui lakna a tibuai a, hei hian ram kang a siam awl em em a ni.