Khawhri Haw Runpui hmang

Khawhri Haw Runpui hmang
Hnahthial district-a Khawhri khua chuan Thawhlehni atang khan Haw Runpui an hmang a. South Tuipui bialtu MLA Jeje Lalpekhlua chuan a hmanpui.
MLA chuan lal huaisen Zakapa lalna tlang, Khawhri khaw haw runpui a hmanpui thei leh Zakapa lim hawn a ni chu lawmawm a tih thu sawiin, khawtlang hruaitute, MLA kal chhuak ta te leh khawtlang mipui inlungrualna fakawm a tih thu a sawi. Khawtlang mipui pawh an thil tihna kawng hrang hrangah lal Zakapa ang bawkin huaisenna nen hma la a, hmeichhiate huaisen taka humhim thin tur leh khawtlang chu dikna leh rinawmna a tan tlat turin a fuih.
He hunah hian Zakapa Award dawngtu Dr Lalrinawmi chuan thu a sawi bawk a. HC Thanchungnunga’n Zakapa chanchin paper a present a. Khawhri khaw chhuak mi hmingthate chawimawi niin, tlaiah khawtlang huapin ruai an theh a ni. Vawiin lamah Haw Runpui hi hman chhunzawm a ni ang.