Khawiva kawng siam a chhia – Congress Thalai Mizoram chhim la

Khawiva kawng siam a chhia
– Congress Thalai
Mizoram chhim lamin power an hmuhna atana pawimawh tak Khawiva kawng siam mek chu a chhe hle tih Congress Thalai chuan sawiin, uluk taka siamtha leh turin thuneitute an phut tih an sawi.
Congress Thalai – MPYCC hruaitute leh LDYCC chuan tlawhin, kawng hi March 2020-a siam tan niin, kawng siamna’n hian sawrkarin cheng nuai 404.19 a dah a, hemi atang hian kum 2020 chhung khan departmental work, contractor hrang hrang 13 kaltlangin retaining wall pathum – Rs 1065000, slab culvert paruk Rs 651000 leh RCC side drain (km. 2.65) Rs 8284000, a vaiin nuai 100 sengin siam a ni tih a sawi.
Hetianga hna hrang hrang mit tlung lo taka an thawh tawh hnu hian kumin kumtir khan Khawiva kawng siam hna DIET (Melte) peng atanga 132 KV Sub Station Khawiva thleng black topping khawih mek chu duhthu a sam lo hle tih sawiin, ‘Kawng siamna atana hmanrua an hman balu leh rora chu third class pawh tling pha lo, balu phei chu vaivut ang lek chauh a ni a, kawng siamna bulthut hi chhemfai mumal lohin vaivut chungah black topping tih tawp a nih bakah kawng an chhun chhah zawng hi 10 mm pawh tling lo a ni a, naupangin an chhuih khawh mai hlauhawm khawpa pan leh chhia a ni,’ thuchhuah chuan a ti.
Power-a chhimlam innghahna leh hmun pawimawh tak panna kawng, heti taka sawrkarin a ngaihthah leh a siamna tur sum beitham tak a dah chu mipui zah lohna leh inngaihthahna lian tak a ni, tiin, a aia tha zawka siam a nih loh chuan Congress Thalai chuan a vil zui reng dawn tih a sawi a ni.
‘DIET peng atanga Khawiva Sub Station panna kawng thawh loh aia thawh ve chauh, fur khat chu sawi loh ruahtui vawikhat tla in a hnawl bo nghal mai mai tura kawng luan hi kan duhkhawp loa, hei aia tha zawka siamtha tur leh uluk taka kawng siamna hmanrua endik a, a tha thei ang ber hmang turin MNF sawrkar kan phut a ni,’ LDYCC chuan a ti.