Khawlum lutuk tuar lovin mi 11 thi

Pathianni khan Maharashtra-ah khawlum lutuk vaangin mi sawm pakhatin nunna an chan a, mi tam tak damdawi ina dah luh an ni.
Sorkar huaihawtin event open ground-ah neih niin ni sensa hnuaiah darkar eng emawzah pungkhawm mipuite zingah harsatna nasa tak a awm phah ta a ni.
Mi tam tak te chu dehydration vangin an tal buai a, a thente pawhin khawlum kaihhnawih avanga buaina hrang hrang an nei bawk a.
Event chu Navi Mubai, Mumbai financial hub bul lawka huaihawt niin temperature in 380C vel lai a kai a. Health expert te chuan April thla hian mipuite chu chawhma lam dar 11 atanga tlai lam dar 4 thlengin pawna chhuak lo tura ngenna an siam hun lai niin April thla hi Indiaa khawlum ber thla a ni fo thin.
Mi tam tak te chu nihliap emaw hulhliap emaw pawh awm lovah an thu nghuk mai a. Officials te chuan mipui pungkhwmte chu refreshment pek an nih thu sawiin harsatna nei thei te tan medical aid an chhawp an ti bawk a, mahse, opposition party te chuan sawiselin tun ang hunah mipui punkhawmna siam chi a ni lo an ti ve thung.
He event hi Kharghar International Corporate Park ground ah neih niin social worker lar Dattatreya Narayan Dharmadhikari, Appasaheb Dharmadhikari tia hriat lar bawk hnena award pek tuma punkhawmna huaihawt a ni.
Politician lawk tak tak telin chung zingah chuan Union Home Minister Amit Shah mai bakah state a rorel lai Bharatiya Janata Party (BJP) hotu lawk tak tak te pawh an tel bawk.
Local media te chuan he event ah hian mi sang tam tak telin an pungkhawm tiin darkar thum chuang hun hman a ni, an ti a. Mi tam takin harsatna an tawk zui a, thahnem tak damdawi in panpui an ni bawk.
Maharashtra Chief Minister Eknath Shinde chuan ‘beisei loh leh pawi tak’ tia sawiin nunna chan chhungte hnenah zangnadawmna Rs 5 lakh pek theuh tur a ti a. Sorkar chuan damdawi Ina enkawl mekte chu a thlawna enkawl vek tur a ti bawk.
Opposition leader te chan sorkar chu mipuite nun tibuai zawkah puhin Chief Minister hlui Uddhav Thackeray chuan event chu ruahmanna mumal siam lova neih tia sawiin chhui chian a ngiat thu a sawi nghal a.
Congress thupuangtu Atul Londhe Patil pawhin state sorkar chu inthlahdah tia sawiin April thlaa event huaihawt avangin nunna chan an awm phah a ti bawk.
Kumin February thla kha India in kum 1901 hnua record awm china February thla lum ber a ni a, khuain lum lam a pan tial tial bawk a, hei vang hian March leh May thla inkarah India ramah heatwave awm thlen theihna a sang hle tia sawi a ni bawk.
India ram hmun hrang hrangah khuain lum lam a pan tial tial a, khawlum zual nasa tak thleng thei reng a ni bawk.