Khawlum turu-in Pakistan tuam

Southern Pakistan chu khawlum turu takin a tuam mek a. Khawlum lutuk avanga nunna chan an pung nasa hle.
Edhi ambulance service te chuan ni tin Karachi city morgue ah ruang 30 atanga 40 vel an thlen thin thu an sawi hial a.
Tun hnai ni ruk chhungin ruang 568 phur tawhin heng zinga 141 lai chu Thawhlehni a thi te kha an ni.
Karachi khawpuiah chuan temperature in 400C pelin humidity sang bawk si nen tempertuare chu 490C vel angin mihring taksa chuan a hria tia sawi a ni.
Mi tam takin damdawi In an pan a. Civil Hospital Karachi chuan pathianni leh Nilaini inkar chhung khan heatstroke avangin damlo 267 an admit niin Dr Imran Sarwar Sheikh, head of emergency department chuan a sawi a, heng zinga sawm pahnih te chuan nunna an chan tiin a sawi bawk.
“Damdawi In panpui tam ber te hi kum 60 leh 70 chho vel vek an ni a, thenkhat kum 45 vel leh kum 20 chho vel te pawh an awm tho bawk” tiin Dr Sheikh chuan a sawi.
Heng khawlum tuar lova damlote hi an luak a, an kua a tha lo bawk a, khawsik sang tak an nei bawk a.
“A tam ber te chu pawn lama hnathawk an ni a. Tui tam thei ang ber in tur leh thawmhnaw pan thei ang ber ha turin kan hrilh hlawm a ni” tiin Dr. Sheikh chuan a sawi bawk a.
Pakistan-a khawlum turu tak hi kar kalta tawp lam atanga intan niin thuneitute chuan heatwave centre leh camp te mipuite tan an siam a.
|anpui ngai tam tak te chuan damdawi in an thleng zo lo bawk a. Wasim Ahmed chuan a hnathawhnaah security guard niin darkar 12 a duty hnua in a haw in a nuamsam lo tih a inhria a.
“Kawngkaah a lo lut a, khawlum lutuk ka ti hlei thei lo tiin a sawi a” tia sawiin a cousin Adnan Zafar chuan, “Tui in tur min dil a, a in zawh rualin a tlu tawp mai a ni” tiin a sawi.
Wasim family tena damdawi in an thlenpui meuh chuan medics te chuan heart attack vangin thia an phurh thlen thu an lo hrilh a ni. Tun hma pawhin lung lam thatlohna a nei a, mahse, khawlum vangin a la talbuai ngai lo tiin an sawi bawk.
Karachi khawlum chu power cuts zing lutukin a tizualkai bawk a, power awm loh deuh reng avangin fans leh air conditioning te an nung thei lo va, chung te chu mi tam tak tena intihvawh nana an hman a ni bawk si a ni.
Muhammad Amin chu power load shedding avanga tuartu zingah a tel a, Pakistan-ah chuan power supply hum theih nan loadshedding kalpui chamchi a ni a, thil thar a ni lo.
Amin chhungte chuan kum 40 chauh a ni a, a dam lo thuta a thi zui mai an ti a. A thih chhan chiah tihchian a la ni lo chungin khawlum kaihhnawih tho nia ngaih a ni.
Karachi chauh chu Pakistan a khawlum tuar an ni lo va. Thla kalta pawh khan Sindh province chuan temperature record siamin 52.2C lawih a tling a ni.
Pakistan mai ni lo a thenawm ramah te pawh khawlum chuan a tuam vek tho va. India capital Delhi ah pawh heatwave turu tak thlengin May thla atang khan daily temperature chuan 400C a hawlh a, 500C a kai lek lek reng zawk a ni.
Karachi-a chengte chuan tun ang em ema khawlum an la tawrh ngai loh thu an sawi a. Karachi-a cheng Mohammad Zeshan chuan, “Climate change vang a ni. Khawvel pumah a ni vek a. Europe-ah pawh a ni tho va, mahse, anni chuan hma an la a, kan ramah erawh sorkar berin hmalakna a nei lo” tiin a sawi.
Mithiamte chuan khawlum nasa chu a zing tial tial ang a, a awh rei tial tial dawn tiin an sawi bawk a. Karachi khawlum mek chuan karleh pawh a la awh dawn a, mahse, tlemin a ziaawm hret tura ngaih a ni thung.