Bolivia-ah sorkar paihthlak tuma hmalakna hlawhchham

Bolivian police-te chuan sorkar paihthlak tuma chet la hruaitu lu ber chu an man thu an sawi a. A hma lawkin sipaite chuan La Paz a presidential palace chu luhchhuah tumin an bei a ni.
Sipai za tel tehmeuh te chuan armoured vehicles hmangin sorkar building pawimawhte awmkhawmna Murillo Squarre-ah an inkulh a. Armoured vehicle pakhat phei chuan presidential palace main gate chu tichhiain sipaite an lut hman a, mahse, a hnuah an inhnukdawk thung.
Rebel military leader-in charge, Gen Juan Jose Zuniga chuan ‘democracy siamthat’ a duh tia sawiin President Luis Arce chu a zah viau chungin sorkar inthlak a awm dawn a ti a. Mahse, a hnu lawkah manin a awm thung.
Gen Zuniga chu a nihna atanga ban nghal niin a hma ni lawk pawhin Bolivia president hlui Evo Morales chu interview a neihnaah a sawichhe nasa hle bawk.
President Arce chuan sorkar paihthlak tumna chu demin mipui te chu democracy humhim tura chetlaa intelkhawm turin a ngen nghal a.
“Bolivian ten sorkar paihthlak kan remti tur a ni lo” tiin presidential palace atanga television kaltlanga thusawina a neihah a sawi a.
President Arce ngenna chuan zawm a hlawh nghal a, pro-democracy demonstrator te chuan kawtthlerah sorkar thlawpna an lantir nghal a ni.
Presidential palace a footage lak tihchhuahah President Arce chuan Gen Zuniga chu hmachhawnin bang turin thupek a pe lai tihchhuah a ni a.
President Arce chuan Gen Zuniga chuan ualau taka Morales a sawisel avangin ban a nih thu leh military commander thar ruat a ni ang a ti zui bawk.
Morales pawhin sorkar paihthlak tumna chu na taka demin Gen Zuniga leh a thuihruai te lakah criminal charges siam ngei tur a ti bawk.
Public prosecutor office chuan criminal investigation kalpui nghalin Bolian Navy hotu lu ber Vice-Adm Juan Arnez Salvador pawh man a ni nghal bawk.
Gen Zuniga an eng vanga sorkar chu paihtlak tuma chet la nge a nih a chhan leh vang chiah erawh hriatchian theih a la ni lo va.
Thawhtanni khan telivision-a a inlannaah nakum inthlanah Morales chu a ding leh dawn a nih chuan a man tur thu a sawi a, Morales chu president a ding leh thei a ni rih lo hrim hrim thung.
Kum 2019 khan military chiefs te chuan Morales chuan presidential election tihchingpen a tum tiin a office chhuahsan lo thei lova siamin Mexico-ah a tlanchhiat phah tawh a ni.
Murillo Square-a sipai ten an thunun lawk chhunga thusawina a neihah Gen Zuniga chuan ‘elite’ ten ram chhung thuneihna engkim chang vek tawhin heng mite hian ram an tichhia a ni tiin a sawi.
Man a nih hma lawkin Gen Zuniga chuan preisdent berin a larna a tlakhniam zel avangin armoured vehicles te chu chhawpchhuak turin min ti, a ti thung.
Opposition senator Andrea Barrientos chuan economic leh judicial crisis thleng mek chuan Arce chu ‘self-coup’ a kalpuitir a ti a.
“Sorkar hian Bolivia mipuite zawhna tam tak chhantir a nei a, thil awm dan kimchang takin a sawi ngei tur a ni. He thil thlengah hian investigation dap kim thei ang berin kan nei tur a ni,” tiin a sawi.
Gen Zuniga helna chawhchhuah chuan hun rei lo te chauh a daih a, mahse, kar lo la awm tur te chu pawimawh hle tura ngaih niin Gen Zuniga helna kalpuiah amah ngawr ngawr chauh inhnamhnawih a ni em tih chu lailan a la ni dawn a ni.
Bolivia sorkar chu derthawng taka ngaih mek niin Arce sorkar chu military ni lovin politics hmanga tihthluk theih reng anga ngaih a ni a.
Morales pawhin amah thlawptute a bik takin indigenous coca-growers te chu sorkar paihthlak tumna an duhlohzia kawtthlera lantir turin a ti bawk a.
Morales leh Arce te chu party khata awm niin an inthlawpna chuan Bolivian thenkhatte rilruah Morales chuan office luah leh a tumphah hlauhna an neih tir a ni.
Kum 2019 khan Morales khan thuneihna a chan laiin term li chelh tumin constitution pawisa lovin hma a la a, mahse, tharumthawhna nasa tak a chhuah hnuah Morales chu bangin an ram a chhuahsan phah nghe nghe a ni.
Chumi hnuah centre-right Jeanine Anez chuan kum 2019-20 khan ram hruai hna thawk lailawkin mahse Morales sorkar paihthlak tumah sulsutu tia puh niin kum 10 lung in tang tura tih a ni a. President ni mek Arce chuan kum 2020 khan inthlanah chakna a chang zui ta a ni.
Arce leh Morales te hi thawk dun thin an ni a, mahse, an inhmu khat hle a, tuna sorkar paihthlak tuma chetlaknaah erawh an inlungrual hle thung.
Kum 2005-a Morales an thuneihna a chan hma khan Bolivia chu America-a politics buai berna hmun a ni a. A sorkar hnuah Andean nation-ah ngelnghehna a thlen viau a, mahse, a tawp lam a zuzi ta thung.