Khawlum vangin Europe buai nasa hle

Europe chhim lam khawlum chuan zual lam pan zelin tunkar hian a la nasa hle tura ngaih niin ziaawm lam pan tumna a la nei lo.
Italy, Spain leh Greece te chuan ni eng emaw zah chhung chu khawlum turu tak an tawng tawh a.
Italian health ministry chuan khawpui 16 laiah fimkhur tura tihna tichhuakin heng zingah hian Rome, Bologna leh Florence te pawh a tel a.
Heatwave hian tunkar hi a la tuam tura ngaih niin Sardinia ah phei chuan 480C a kai thei tura ngaih a nih thu Italian media-te chuan an tarlang.
Europe-a temperature record sang ber erawh August 2021 khan Sicily ah record ni thungin 48.80C a kai a, hei erawh tun khawlum hian a pha lo tura ngaih a ni thung.
Italian weather service chuan tunkara khawlum hmunpui ber tur chu Sardinia a ni dawn tiin a sawi a, khawlum turu lutuk sawi nan hian Charon, Greek mythology a ferryman underworld a thlarau te hruaitu sawina chu hman a ni.
“Temperature in 19 leh 23 July ah a tawnsan ber lai tawngin Italy ah chauh ni lo Greece, Turkey leh Balkans te pawh a tuam vek ang a. Heng hmunah te hian heat record thar awm thei a ni” tiin Italian meteorologist leh climate expert Giulio Betti chuan a sawi.
Italy sorkar chuan heng hmuna chengte chu kar kalta Inrinni atang khan zing lam dar 11 atanga dar 6 thlengin ni eng hmachhawn lo turin a ngen a, a bik takin kum upate phei chu fimkhur zual turin a ti a ni.
Rome khawpuiah chuan tour guide Felicity Hinton chuan temperature sang bawk si mipui tam bawk si chu khawpui veivahna lamah mangchhia a ni ringawt tiin a sawi a.
“Rome hi chu a lum reng a, mahse, tun ang em ema a lum rei hi a la awm ngai lo. Ka thian te ho nen pawh kan chau zo tawh a. Zinna lamah mi tam tak chaua awmin hmun tinah ambulance chhawp a ni,” tiin a sawi bawk.
Rome-a cheng kum 62-a upa Elena chuan summer temperature chu kum 2003 atang khan a danglam zual nasa tan a, a kum telin a lum tial tial tiin a sawi.
Hetih lai hian Greece-ah chuan temperature in 400C kai chhoin tourist te tlawh nasat ber Acropolis, Athens a mi chu kar kalta Zirtawpni leh Inrinni pawh khan khar a ni hial a.
Spain-a Canary Island-ah pawh La Palma-ah kar kalta Inrinni khan khawlum lutuk avangin kang mei chhuangin ram 4,500 hectares a kang chhe tawh a, mi 4,000 chuang hmun hima thiarin an awm tawh bawk.
Fernando Clavijo, president of the Canary Islands regional government chuan kangmei chu a nasat thu sawiin Spanish army te chuan firefighter 150 chuang an tirlut bawk a, thenawm tenerife atang pawhin tanpuina pekluh a ni bawk.
Europe heatwave hian Balkans te pawh tunkar hian a nuai dawna ngaih niin Serbia leh Hungary te chuan khawlum hi tawng der tawhin 35C vel a ni mek thung.
Khawlum hi thil thleng pangngai a ni a, khawvel puma thil thlen thin dan a ni chungin a thlen dan a zing tial tial a, a awh rei tial tial bawk. Europe khawmualpuiah meuh pawh nipui lai khawlum pangngai chu a awm tawh lo tluk hiala ngaih a ni.
Paolo Ceppi, lecturer, climate science, Imperial College London chuan northern hemisphere lamah heatwave a thleng zur zut tiin a sawi a. “Southern Europe-ah khawlum turu a thleng a, chutih mek laiin southern US ah pawh khawlum turu a thleng bawk a. Tun hnai lawkah south Asia, India leh China ah te pawh heatwave nasa tak a thleng bawk a” tiin a sawi a. “Hengte hi thil mak a ni lo, baseline temperature a sang tial tial a, extreme event nasa zawk thleng thei turin thil a kal mek zel a ni,” tiin a ngaihdan a sawi a ni.