Khawpuia ram leh in ho chhinchhiah tha vek dawn

On Feb 19, 2025 8 0

Khawpui (urban) a ram leh in ding ho chu tunlai hmanraw changkang leh tha zawk nen chhinchhiahna siamthat tum a ni a. Aizawl chhim lam, Aizawl Municipal-a Ward No. XI to XIX chu a bul tanna atan hman a ni dawn.
National Geospatial Knowledge-based land Survey of urban Habitations (NAKSHA) tia lamtawi hi India ram puma kalpui tur a ni a, bul tanna tur pawh sawrkar laipui lamin a thlan sa a ni. Thawhlehni khan a rualin India ram pumah khuhhawn a ni a, Union Rural Development minister Shivraj Singh Chouhan chuan Raisen, Madhya Pradesh-ah a khuhhawng. Aizawl chuan Land Revenue & Settlement minister B Lalchhanzova’n a khuh hawng a ni.
He programme a hlawhtlin theihnan hian Revenue department, UD&PA department, AMC, local council leh NGO te chu a neitu an nih angin, theihtawp chhuaha thawk ho turin minister hian a chah a. Aizawl South (Ward XI to XIX) chhunga veng 43-a khawtlang leh tlawmngai pawl hruaitute chu theihtawp chhuaha department tha tichaka ke pen turin a sawm tih a sawi a ni.
Revenue director R Lalthazuala NAKSHA scheme a sawifiah a. Survey of India lam mithiamten technical report an pek bakah drone hmanga thlalak/ mapping tih dan demonstration an nei a ni.
8 NAKSHA hi sawrkar laipui Ministry of Rural Development hnuaia Department of Land Resources-in central sector scheme a kalpui mek DILRMP hnuaia programme thar a ni.
8 India khawpui 153 chu pilot project atan thlan niin, chu’ng zingah chuan Aizawl South (AMC Ward XI to XIX) hi Mizoram atanga thlan a ni.
8 NAKSHA tum ber chu khawpui land record tih changtlun a ni a; Aizawl South huamchhung hi oblique angle camera leh LiDAR sensor hmangin drone emaw helicopter emawa thla lak a nih hnu ah 3D map teh theih siam chhuah a ni ang. Chu chu leilungah finfiah leh vek a ni anga, chumi hnu ah final map siam a ni ang.
8 Map hi 3D a nih dawn avangin ram pass zawng zawng chhinchhiah a nih bakah ram chhunga awm in leh building pawh teh theihin a awm vek dawn a. Hei hian Revenue department bakah UD&PA, AMC, Disaster Management & Rehabilitation lam tan leh, khawpui planning atan hmanraw pawimawh tak a ni dawn a ni.