A bu hming pawh “Hun inher kara Zofate” tih a ni a, khawvel inher vel kara Zofate chanchin ziahna, khawvel chanchina Zofate chanchin sawina a ni ber ang. He lehkhabu hi Mizo Academy of Letters-in 2024 chhunga Mizo tawnga chhuak lehkhabu tha berah an thlang.
“Ka lehkhabu ziah ve tawhah chuan he lehkhabu hi ka duh ta berin ka hria. Ka hahpui ber, ka buaipui nasat ber a ni a, chuvang te pawh a ni ang, he lehkhabu hi ka duh berin ka hria,” a ziaktu F Vanlalrochana’n a ti.
Kum li vel a ziak a, ennawn lah a ennawn nasa. Bung hrang hrang kha bung khata sawr khawm te a nei a, paih a nei, belh a nei, a kawm (cover design) pawh vawi li a thlak.
Khawvel history-a thil thleng lian tak taka Zofate lo tel ve dan a hrut a, Korean war-a Zofate tel ve dan te pawh a tel.
“Hun kal ta, vawiin leh hun lo la thleng tur ka hrut ni berin ka hria a, hun lo la thleng tur han tih hian hun lo la thleng tura kan awm dan tura ka duh ka sawi a,” a ziaktu chuan ti a, “Khawvel history-a thil pawimawh Zofate’n kan lo tawn ve, kan tel ve dan te ka ziak a, kan hnam hi kan tlem a ni thei, mahse khawvel chanchina thil thleng pawimawhah hian kan lo tel ve thin tih te, chung chu hriat a tul ka ti a, ka ziak ta a ni,” a ti bawk.
“Ka thiam danin ka ziak a, kan hnam chanchin hriatna hrim hrim bakah, kan hnam chanchin hi heti zawng te pawh hian sawi ve ila tiin, ka sawi thiam ve danin ka ziak a ni,” a ti bawk.
F Vanlalrochana hian lehkhabu pariat a ziak tawh a, a lehkhabu hmasa ber “Hmangaihna Zunzam” chu 2010-a mi a ni. Mi dang nena inziah tawm a nei nual bawk.
A lehkhabu thar ber, Book of the Year-a thlan hi 2022-ah khan a peih tawh a, chhuah mai lova a ennawn leh avangin a chhuak har ta a ni. A tira bung 66 kha bung 41-ah a chhuah.
Khawvel chanchinah Zofate chanchin
Get real time updates directly on you device, subscribe now.
Next Post