MHIP-in inkhawmpui hmang Engkimah inrawlh tum loang – Chief minister

MHIP-in inkhawmpui hmang
Engkimah inrawlh tum loang
– Chief minister
Mizo Hmeichhe Insuihkhawm Pawl chuan Thawhlehni khan Aizawlah general assembly vawi 24-na an hmang a. Hmanpuitu chief minister Lalduhoma chuan MHIP leh tlawmngai pawl dangte an hmalakna tur awm hria a, engkimah inrawlh tum lo turin a chah.
Chief minister chuan MHIP-in mipui zirtir leh rawngbawl hna a thawk nasa tih a sawi a. Sawrkar an thawhpui tha thin tih sawiin, fahrah chawmna in an neih bakah dan ang thlapa fa lak a kalpuina azarah fahrah tam takin nu leh pa an neih phah tih a sawi a ni.
An sawrkarin hmeichhiate an ngaihsak zia an tihlanna langsar tak pakhat chu, a hmasa ber atan hmeichhe cabinet minister an nei chu a ni, tiin, tha taka an thawhpui an beisei tih a sawi.
“Mizoram hi India rama hmeichhiate dinhmun that berna zing ami a nih a rinawm a, kan hmeichhiate hi kan state thawhchhuahah in inrawlhthuk hle. Kan hnam nunphungah hmeichhiate hi zah taka enkawl in ni thin a, a tilang chiangtu chu kan tawng kauchheh hi a ni. Tunah phei chuan kawng tam takah mipa in kan tluk tawh lo che u,” a ti.
Chutihrualin mipa rorelna hnam kan ni a. Chhungkuaah hmeichhiaten an pasalte thu an ngaihchan thin tur a ni tih Lalduhoma hian a sawi.
“Thutawp siamna chi reng reng chu pa kut a ni. Pasal nikhua lo tak, rawn tlak ngang loh in nei a nih ngawt loh chuan nuin chhungkuaah rorel tum suh u. In pasalte finchhuah ula, an mawi lohna lai hliahkhuhin timawi zawk rawh u. Chu chu nupui tha zia a ni. Zo nun zemawi a ni satliah loa, Pathianin nupuite awm dan tura a ruat a ni,” a ti.
Hmeichhiate ngaihsan zawng milin mipa kan nung mai thin a. Huaisen an ngaihsan chuan mipa in ‘huaisen’ kan tum mai a, hausa an ngaihsan chuan a dik emaw dik lo emaw thlu loa hausak kan tum mai tih chief minister hian a sawi.
“Ngaihhlut tur dik tak ngaihlu ula, in sukthlek hmangin kan hnam hi thui tak in kaihruai thei a ni,” a ti.
MHIP leh tlawmngai pawl dang chu mahni pawl thil, Pathian thil leh Kaisara thil thliarthiam turin a chah a. An hmalakna tur awm tak a awm rualin midang hmalakna tur awm tak pawh a awm, tiin, engkima inrawlh tum lo turin a chah.
MHIP president Ngurmawii Sailo pawhin MHIP-in kum 50 a tling ta a, kum 50 chhunga hruaitu lo ni tawh zawng zawngte an hrereng tih a sawi a. An kawng lo sial tawhah, pawl thiltum tihlawhtling tura tumah thlei bik nei loa kal zel an tum tih a sawi. MHIP hian nikum July khan an kum 50-na an lawm tawh a ni.
MHIP general secretary Lalliani report danin, MHIP hian Sub Hqrs 10, Block 30, Joint MHIP 9 leh Branch 765 a nei a. Member 289300 vel an awm mek.
Inkhawmpuiah hian MHIP vice president, Padma Shri B Sangkhumi bakah kum 30 chhung MHIP kaihhruai hna lo thawk tawh hnenah chawimawina an hlan a ni.