Khawvel huap silver leh bronze medal awrhtu Rempuii leh Sanga

Hyderabad-a BWF Junior Ranking Tournament Kotak India Junior International Series 2025 khelh zawh takah Mizo player pahnihin medal pahnih an hlawh chhuak!
Silver leh bronze medal vaw chhuaktute hi C. Lalramsanga s/o C. Lungmuanpuia, Durtlang leh Lalrempuii d/o Albert Lalrosanga (L), Serchhip-te an ni.
Ramsanga hi men’s doubles category-ah Bhavya Chhabra nen tangdunin he tournament hi an hmachhawn a, seeded no 1 an ni.
An match hmasa berah S. Rayaprolu leh A. Singh-te tangdun chu 21- 15, 21-12-in awlsam takin an hneh phawt a; quarter0-final match-ah G. Kaviarasu leh V. Surendar-te inkawp chu 21-13, 21-13-in an hneh leh.
Semi-final lamaah A. Aneesh leh A. Sreenivas PV-te inkawp chu 21-16, 19-21, 21-18-a hnehin, final-ah erawh Niranjaan GN Nandakumar leh Yudhajith Reddy Padigepati tangdun lakah 21-17, 14-21, 21-23-in vanduai zawk ah an tang a, silver medal an dawng.
Women’s doubles category lamah Rempuii hi Zenith Abbigail nen an inkawp a, unseeded an nih avangin qualifying round atanga bul tanin, semi-final an in vaw thleng a ni.
Last 4-aan hneh ngei tura ngaih Keerthy Manchala leh Varna Prabu Anand tangdun an ngam ta lo tlat a, 21-15, 21-14-in tlawm zawkah an tang a, bronze medal an lungawipui mai a tul phah.
He tournament hi BWF hriatpui ranking tournament niin, karleh lam hian Pune-ah BWF ranking tournament hran, level sang zawk, India Junior International Grand Prix 2025 an khelh chhunzawm lehnghal dawn a ni.
Tin, he tournament-ah hian Ramsanga leh Rempuiite bakah H. Lalthazuala (men’s singles) leh Sainunmawia Sailo (men’s doubles)-te’n Round of 16 an thleng bawk.
Mizoram Badminton Association chuan thuchhuah siamin, “Kan Mizo shuttler-te hi kan chhuangin, an hlawhtlinnaah kan lawmpui a, karleh lama tournament lian leh ropui zawk an hmachhawn turah tha taka khel thei turin duhsakna kan hlan bawk a ni,” an ti.