Khawvel puma Muslim-ten Ramadan hmang tan

Khawvel puma Muslim-ten Ramadan hmang tan
Muslim-te thla thianghlim, Ramadan chu khawvel pumah a intan ta a. Ni 29/30 lo awm leh tur chhung chu Muslim-te hian an awmna hmun azirin ni khatah darkar 12 atanga 16 chhung engmah ei leh in lova an awm an tan leh ta.
Muslim-te hian Ramadan hi kum 1,400 chuang liam tawha Prophet Muhammad-a hnena Quran-a a chang hmasate puan a nih hun kha niin an ngai a ni.
Ei leh in insumah hian ei loh, in lo, zuk loh leh mipat hmeichhiatna hman pawh a huam a, hengte hi ni a lan chhunga tih loh vek tur a ni a. Chu chu ‘taqwa’ (Pathianin thil a hriat theihna) an hlawh chhuah theihna tura ngaih a ni.
Ramadan hi kum tin a hma kum chiaha a intan hma ni 10 atanga 12-in a hma ziah a. Hei hi Islamic calendar hi lunar Hijri calendar an tih, thla khata ni 29 leh 30 awm chi-a an innghah vang a ni.
Lunar year hi solar year aiin ni 11-in a tawi zawk tihna a ni a, kum 2030-ah phei chuan Ramadan hi vawi hnih an hman a ngai dawn a, a hmasa zawk January 5-ah tanin a hnuhnung chu December 26 atangin a intan dawn a ni.
Khawvelah ni chhuah leh tlak inkar a inchen vek loh avangin ni lan chhung a inchen lo va, Muslim-te chu an awmna ram azirin an ei leh in nghei chen tur pawh a inang lo.
Khawvel chhim tawp lama cheng Muslim, Chile leh New Zealand vela mite chuan darkar 13 chuang an nghei dawn laiin hmar tawp lam ram, Iceland leh Greenland velah chuan ni a rei hun lai a nih avangin darkar 16 chuang an nghei a ngai a ni.
Hmar lama Muslim chengte hi kum hmasa ai chuan an nghei chhung a tawi hret dawn a, a tawi zawng hian kum 2031 thleng a kal dawn a. Hemi hnu lamah hian hmar lama mite tan nghei chhung a rei veleh hret hret ang.
Hetiang chiah hian chhim lama Muslim awmte chu nikum aiin an nghei chhung a rei ve hret a, kum 2031 thleng rei hret hret zelin a dawt leh kum atangin a tawi leh hret hret ang.
Kuminah hian a nghei rei ber turte chu Nuuk, Greenland leh Reykjavik, Iceland te niin darkar 16 an nghei dawn a ni.
Ramadan hi tawng hrang hrangin chibai bukna a awm a. Muslim tamna ram chuan anmahni tawngin an tichhuak nasa thin.
‘Ramadan Mubarak’ leh ‘Ramadan Kareem’ tih chu khawvelin a hman lar ber a ni a. In malsawmna leh thla duhawm tak hmang tura induhsakna a ni.