Tangrual sorkarah khi a awm lo – Fadnavis

Tangrual sorkarah khi a awm lo – Fadnavis
Maharashtra-a rorel lai tangrual, Mahayuthi chuan budget session neih dawn lai meka an inkara khi awm nia thuthar chu a dik lo tih an sawi.
Chanchinbumite hnenah Chief Minister Devendra Fadnavis chuan, “Tangrual sorkarah hian Cold War a awm lo. Kei leh Eknath Shinde hian kan pahniha kan tih tur kan chiang a… Eptute kan bei hlawhtling dun a, chiang takin assembly inthlanah pawh kan chak dun a ni,” a ti.
Chief minister-in thuthar lakhawmtute a kawm hi Pathiannia cabinet thutkhawm leh tih dan thin anga tea meeting zawhah a ni a, thingpui in hi eptu tangrual, Maha Vikas Aghadi chuan an boycott nghe nghe.
“Eptute hi chu keini ang an ni lo va, keini chu kan inpumkhat tlat a… eptute inkarah hi chuan inpawhna leh inerna a awm tlat a ni,” tiin a sawi.
“Vawiin pawh hian eptute hi ‘Chahapan’ (budged session hmaa snack meeting)-ah kan awm a; mahse, an boycotted a. An hruaitu lawkte tel lovin an thutkhawm a. Lehkha phek kuaa thui min hlan a, hming pakua intar langah pasarih chauhvin hming an ziak thung a, chanchinbumite sawi atanga an hriat hmang chauhvin thil an sawi mai mai a ni,” tiin Fadnavis chuan a sawi.
Maharashtra-a tangrual sorkar chhungah hian tun hnaiah innghirnghona a awm tih hi sawi a awm reng a. Term liam taa chief minister, Shinde chu tuna hmun a ken tak, Fadnavis-a nen an la inmil thei lo nia sawi a ni.
A kaihhruai party hruaitute hnena venhimna pek thin tihhniamsak leh Kumbh Mela neih lehna hmun tur, Raigad leh Nashik district tana guardian minister ruat danah a lawm lo nia sawi a ni.
Shinde-a kaihhruai Shiv Sena MLA 55-te chu tun hmain Y Category security nei thin an ni a, tun hnaiah tihhniamsak an ni a. Sorkar chuan an tan hlauhawm a awm tam tawh lo niin a sawi a, Sena chief chu venhimna tha tawk la pek reng a ni tho niin an sawi.