Khawvela mihausa berah Elon Musk inhlangkai

Elon Musk chuan luxury goods giant LMVH, Bernard Arnault chu nawrthlain khawvela mi hausa ber nihna a chelh leh ta.
Musk hausakna hi January thla atanga khan $55.3 billion-a pungin $192 billion vel nei anga chhut a ni a, hei hi a electric car company Tesla hlutna pun vang a ni.
Arnault hausakna erawh $24.5 billion a tlahniamin $187 billion vel neiah Bloomberg’s Billionaire Index chuan a tarlang thung.
Amazon neitu Jeff Bezos chu pathumna niin Bill Gates chuan palina a hauh thung.
Kum 74-a upa Arnault chuan kum 51-a upa Musk chu rich list ah hian nikum December thla khan a khum a LMVH chu luxury goods demand san hnuah a share a san vang a ni.
Khatih lai khan social media platform Twitter a lei tak hnuah Musk a Tesla share chu tlahniam vakin hei vang hian a hausakna chu a hniam phah dawrh a ni.
Mahse, Musk-an Twitter chief executive nihna a kalsan hnuah Tesla share chu nasa taka pungin kumin hian 92% ah a kaisang lawih thei a ni.
Tun kara China pana Tesla chungchang sawiho tumna chuan phurna a siam bawk a, chu mai bakah artificial intelligence sang zual zel chu car firm hian a hlawkpui bawk.
Chutih laiin LMVH te Louis Vuitton leh Christian Dior neitute chu an tlahniam thung a. April thlaa an san ber lai an tawn hnu atang khan 16% in an tlahniam tawh thung a.
Arnault hian heng luxury goods giant te hi kum 1987-a a din niin tun thlengin majority stake a la nei reng a, Europe puma firm hlu ber a la ni reng thung.
January thla khan French pachal hian a fanu Delphine Arnault kum 47-a upa chu fashion house Dior enkawl turin a ti a, hei hi LMVH a siksawina kal zel a ni a. Arnault fa panga lai te chu an group hnuaiah hian hna pawimawh tak tak thawhtir vek an ni.
Bloomberg te chuan Amazon founder Jeff Bezos chu khawvela mihausa ber pathumna tiin $ 146 billion neiah chhutin Gates, Microsoft dintu chuan $ 126 billion vel nei angin an chhut bawk.