Khawvela pa upa ber kum 113 a tling ta

Khawvela pa upa ber kum 113 a tling ta
Khawvela mipa damlai zinga upa ber, Brazilian Joao Marinho Neto chuan October ni 5 khan kum 113 a tling ta a, a pianchampha lawmna hun a chhungten an buatsaih sak. Joao hi nikum November khan John Tinniswood thih hnuah, kum 112 leh ni 52 a upa a nihin khawvela mipa damlai zinga upa ber title hi hlan a lo ni tawh a, tunah chuan kum khat dawn he title hi a kawl ta a ni.
Maranguape, Ceara, Brazil-ah October ni 5, 1912 khan a piang a, tuna chuan 1912 a piang mipa zinga dam awm chhun a ni tawh. Loneitu chhungkua atanga seilian niin, mipa naupang kum li mi a nih chuan a pa kiangah, huanah hna thawkin, ran chaw pek leh thei rah lawh te a ti ve zak zak tawh.
Josefa Albano dos Santos nen inneiin, fa pali an nei a, a nupui hian 1994-ah a thihsan a, chumi hnuah nupui dang nei lehin, fa pathum a neih belh leh a, tunah chuan a fate parukin an la dampui a, tu 22 leh tuchhuan 15 bakah a khupthum hmuhna tu pathum a nei tawh bawk a ni.
Joao hian a damreina chhan an zawhna chu mi rilru tha te bulah a tal tam a, a hmangaihte leh amah hmangaihtu te kiangah a awm a, chu chu a damrei chhan ni a a hriat thu a sawi. Tuna chuan Joao hi chhinchhiah theih chinah khawvela mipa damrei 26-na a ni tawh.
Joao hi mipa lama upa ber a nihrualin, hmeichhe lama upa ber Ethel Caterham, UK, chuan kum 116 a tling tawh a, ani hi tuna khawvela upa ber a ni mek.