Guinness World Records chuan Maria Branyas Moreira chu khawvela upa berah an puang thar a, January ni 19 khan ‘upa ber’ title hi an pe a, chutih lai chuan kum 115 leh ni 319 a upa a ni. A hmaa khawvela upa ber French nu Lucile Randon chu January ni 17 khan kum 118 leh ni 340 mi niin a thi a, Maria chu upa berah an puang ve leh ta a ni, Maria hi Olot, Catalonia, Spain a cheng a ni.
-- Advertisement --
Maria Branyas Moreira chuan a damreina chhan ni a hriat te sawiin, “Invawn fel,nun thlamuang, chhungte leh thiante nena inlaichinna neih that, siamtu kutchhuak te nena inzawmna neih that, rilru tih hah loh, inchhirna neih loh, a êng zawnga thil thlir thiam leh mi tha lo laka inthiar fihlim,” te a nih thu sawiin, “Damreina hi vanneih thil a ni ve pakhat bawkin ka hria. Vanneihna leh inthlahchhawn a ni ve,” a ti bawk.
Maria Branyas Moreira hi March ni 4, 1907 khan San Francisco, California-ah a pianga, hmeichhe naupang kum riat mi chauh anih laiin a nu leh pa ten Spain-ah an kir pui leh ta a ni. Tunah chuan kum upate enkawlna hmun Residencia Santa Maria del Tura-ah awmin, he nursing home-ah hian kum 22 zet a awm tawh a ni.
Chhinchhiah theih china mihring piang tawh zinga damrei ber chu French Jeanne Calment niin, AFebruary ni 21, 1875-ah a piang a, kum 122 leh ni 164 mi niin, August ni 4, 1997-ah a thi.