Khawvela upa ber Maria Branyas Morera a thi

Guinness World Records-in khawvela upa bera a puan Maria Branyas Morera chu August ni 19 khan kum 117 mi niin a thi. A thih thu hi Gerontology Researc Group-in an nemngheh hnuah GWR hian an puang ta a kum 117 leh ni 168 a upa a ni a, chhinchhiah theih china khawvel mihring piang tawh zinga damrei lama pariatna a ni pha. Maria hi kum 20 vel zet a awm tawhna, Catalonia, Spain-a nursing home-ah a chawl ta a ni.
A hmaa khawvela upa ber Lucile Randon (France) a thih hnuah Guinness World Records chuan Maria hi khawvela upa ber a nih thu January 2023 khan a puang, Maria chuan a damreina chhan nia a hriat a sawi zingah mahni invawn peihna, thiante leh chhungte nena inzawmna neih that, siamtu rilrem zawnga khawsak, rilru tihhah vak vak loh, vei ngut ngut neih loh, a êng zawnga thil thlir thiam leh thian sual kawm loh tih te pawh a tel a, “Damreina hi chu vanneih vang a ni pakhat bawk. Vanneihna bakah inthlahchhawn ve deuh te pawh ni telin ka hria,” a ti bawk.
Maria hi March ni 4, 1907 khan San Francisco, California-ah a piang a, a nu leh pate hi Spain atanga America-a pem an ni a, Texas leh New Orleans velah te an insawn kual hnuah 1915 khan Catalonia-ah an pem leh ta a ni. Catalonia pana lawnga an chuannaah Maria hi chesualin a beng pakhatin ri hriatna a hloh phah a, a pain TB a vei zui ta bawk.
Barcelona-ah an inbengbel a, chumi hnuah Catalonia hmarchhak lama Banyoles khuaa an insawn leh ta a ni. Kum 24 a tlinin Dr Joan Moret nen an innei a, fa pathum neiin, Spanish Civil War (1936-1939) ah sipai hliam te enkawlin an nupain an buai hle a, indo tawp hnuah pawh a pasal assistant angin a awm zui ta zel a ni.
Dr Moret hi 1976 khan a boral a, an fa upa ber chu kum 86 mi niin a thi tawh bawk a, tunah hian a fate pahnih dang chu an la dam ve ve a, tu 11 leh tuchhuan eng emaw zat a nei tawh bawk. Khawvel Indopui Pakhatna leh Pahnihna, Spanish Civil War, Spanish flu hripui, bakah COVID-19 hripui te pawh a lo paltlang vek tawh bawk a ni.