Khawzawlah District MJA a ding

Khawzawlah District MJA a ding
District hawn thar pathum zinga a pahnihna turin Khawzawlah District Mizoram Journalists’ Association (MJA) a ding ve ta a, Zirtawpni khan MJA Gen. hqrs. president C Lalrambuatsaiha’n a hawng.
MJA president chuan, MJA Khawzawl District hawn a ni chu MJA bakah Khawzawl district tan chhinchhiah tlak a ni tih a sawi a. Chanchinbumite chu sawrkar kutke pawimawh an ni, tiin, langtlang taka sawrkar a kal a, dik taka ro a rel theihnan hmanraw tangkai an nih angin, sawrkar pawhin a theihna zawn zawnah a duhsak thin tih a sawi.
Hetihrual hian chanchinbumite chu sawrkar thu thuin an awm tihna a ni lo tih sawiin, “Sawrkar kalphunga thil fel tawk lo leh dik tawk lo awm puanzar kawngah kan tim tur a ni loa, thil dik lo awm chu huaisen takin kan puang chhuak thin tur a ni,” a ti.
Hmanpuitu district bawrhsap K Vanlalthiana pawhin, MJA Khawzawl District a ding ta chu lawmawm a tih thu a sawi a. Chanchinbumite chu mipui rilru sukthlek kaihruaitu an nih angin an thuchhuah turah ngaihtuahna fim tak hmang thin turin a chah a. Hetiang chiah hian mipui pawh social media-a thu leng vakah innghat mai loa, thulakna atan chanchinbu rintlak ngei chhiar nachang hre turin a chah a ni.
Khawzawl SP F Lalbiakzauva, Khawzawl IPRO Lalzara, Khawzawl district-a sawrkar department hotute leh NGO hruaituten an hmanpui a. MJA Gen. Hqrs leh MJA Champhai District atangin an hmanpui bawk.
MJA Khawzawl District-ah hian member 6 an awm a, MJA Danbu ah, member 6 awm tlinnaah District MJA a din theih a ni. Ding thar an nih angin, MJA Gen. Hqrs. chuan hruaitu tur pawh a ruatin a ruat rih a, president-ah Lalthlamuani Ralte ruat a ni.