Lalhmangaiha Sailo
Holy Cross Bakery
9436360275
-- Advertisement --
Gandhi Memorial High Sikul Platinum Jubily hman tur inchawhphur (warmup) nan Group thlalakte in rawn post tiam tiam a, a hmuhnawm thin khawp mai. Keini ang Siniar tar lungleng pawhin hre ve lem lo mah che u ila min nghawng dawt thin alawm le.
Khawnge GM High Sikul din tirh lai Chawnchhim khawpui dinhmun leh kan chettlatna chanchin tlem azawng kan sawi leh ang e aw!! Ngaihnawm i tih loh pawhin chhiar chhuak la, a lo nih hlawm tak hi i ti mahna.
SAWRKHAR HNATHAWK TE:
Damdawi (Health) lam:
Damdawi in mawi tak leh compound remchang takah Dr R Doliana hovin Compounder Lalzamlova (Tanpuii Pa) Staff Nurse Pi Dengziki leh Nl Lalnunmawii (w/o Khawnghinga) Sialsuk nula an thawk a, IV Grade-ah Pu Zaliana leh Pu Kawlha Paruala pa te an thawk.
Central Intelligent (SIB):
Pu Hmingdailova (Patea) Dahrawk hoin Pu Lalthankima Vengthlang Lal In an luah a, a hote – Saienga Sailo, Phungkama, Thangchuanga, Lalbuanga Sailo, Thangvia (Via) te an chhungkuain an awm hlawm.
Agriculture:
Vanlalngena (Demonstrator) s/o Rev Chhuahkhama – Ani hian Chalthei kung leh Grape kungte hi a zawm thin a. A hmingah Ngenthingzawma te an ti mai mai.
Civil Police:
Darrothuama ASI Kawmpawndar Chawnga fapa Dawrpui Veng O/C in Constable Pakhat a nei. Vengthlang Biak in Kawt Khualbuk bulah quarter a awm – A hnu 1952 hian Hranglawta ASI Chalrang Lal Thangkima fapa a rawn awm a, constable pahnih Vanthuama leh Biaksanga, Zote khua ve ve (R Khawbula patea leh putea) an awm a. Tuna Thana khi sak thar hlim niin office leh quarter pakhat a awm. A chung Di, a chhuat lei a sak a ni.
ME Sikul :
Pu Vanlallawma Headmaster niin, Staff te Pu Laihluna, Selluaia, Lalluaia Assamese teacher leh Lalhmingthangi Sailo te an thawk.
Primary Sikul:
Kahrawt vengah Pu Lianvela (Hrangkhuma pa) Sikul leh Vengthlangah Pu Awia (Thangkimi Pa) Sikul hlun tak an awm.
Postal Department:
Pu Thangvela Dak semtu a awm a, Mi zawng zawng hriat a ni.
PWD:
Pu Lalkhuma Mohorir Rahsi veng Chung Tlangah quarter luahin chhungkuain an awm thin.
Bangla IB: Chawkidar Pu Chaka palian pui (Rahsiveng Bangla bulah an awm a) Palian, pa nelawm tak a ni a. Mi hriat hlawh tak a ni.
Zahuata CI: Rahsivengah chhungkuain an awm.
Heng hunlai hian Chawlhni tlai thianzahoa kan len chhuah tawh hi chuan Rahsiveng Nl Thanchhungi te, Suakthuami te, Vengthlangah Nl Thangkimi te in hi suar tluan in, thalai hla Pu Rokunga te Pu Vankhama te hla hi a chhuak thar apiangte hi kan zir a. Kan hlim thin khawp mai. Nl Thangkimi phei kha chu khawhar hla chenin a thiamin zaipui a nuam a, zaimi pathlawi lungleng SIB Staff te leh Sikul naupanghote hian zaipui chang kan nei thin.
VARIETY PROGRAMME: Vawikhat chu tuna HNAHSIN KUT an tih hun lai vel ang hunah hian Middle Sikul lamin Variety Programme an buatsaih a, hemi tum hian FAPA TLANBO chanchin kha GM High Sikul lamin kan zuk chhuah ve chu K Saibela fapa tlanboah changin Hualsavunga, Lalbiakthanga leh LZ Zomawia te ho an han chang chu an chang thiam bawk, hmuhnawm an ti teh a sin.
Hemi zana thil hmuhnawm leh min tinui nasa em em maitu chu maw, Tv Lalluaia Assamese teacher, fit 6 dawna sang palian tak leh, Pu Selluaia, teacher ten kawrchung ha ve ve chungin Mau tlawnin bag an zawn dun chu pui tak a ni. An han zawn dawn a, an insanhleih si a, Pu Selluaia lamah a tawlh thla zel si, an zawn dun thei lo. An kawr chung phelha an han inhak thleng leh zet phei chu – pakhat, ban pawh rawlh thei lovin a inkap parh a; pakhat, pawnpui tel sin hlan ang a ni. Kan hlimpui tak zet zet a ni.
RIHDILAH KA HLEUH :
1952 Nipui chawlh laiin, Lalchianga Ruantlang, Savunga Tualte, K Saibela Biate, J Lalhmachhuana Khawhai, Sangthuama Lungtan leh Vengthawma Mualcheng te nen Rihdil en turin Ruantlangah Lalchianga te inah kan riak phei a, a tuk zingah kalin Rihdil kan han thleng chu chauh pawh sawi lovin, engtia zau nge ni reng tih hriat duhin kan kal kual tan ta. Sana te nei hlawm hek lovin, a sir thingbuk ni chhun dan atang chuan kan hisap ta mai. Kan hisap sual tampui awm lo ve.
Rihdilah ka cheng ve tawh a ni tih kan duh a. Nghakuai chiah thin ten a sir atanga mau Lei an dawh chu kan zawh a, kan zuk zuang thla ta sap sap a. Intihuai deuhvin in chhung dung chen dawn chu ka va hleuh a. Kan liluh vel mawle!! Vawiin thleng hian kal leh chu awm ta lovin. Mitthlaah erawh ala cham reng thung a, thiante mualliam tate ka ngaihtuah zui chang te awmin, lunglenga kur chang te zuk la awm thin a.
Allumni whatsapp ka lo chhiar ve nual thin a, thenkhat ten, ‘hmanni Champhai ka han zin chuan Champhai khawpui leh sikul vel ka han fang chu a lo danglam lutuk tawh, lung pawh a leng lo’ te an ti nual a. Hei erawh ka ngaihdan a ni lo. Tun hian hman Nunhlui min ngaihtir thin zawk a ni. GM High Sikul-a kan luh hun chhung kha ngaihtuahin thlir thlir kir ila, kan Sir A Sawihlira’n Algebra/Mathematic Class a lak hun chhung kan man fuh thei lawk lo ti tauvin thiante tlanbo puiah sawma Vawmbal tuikhur ngaw hnuaia kan tawm bo laite kha ngaihtuah mai mai pahin Assam rama High Sikul Museum tha ber GM High Sikul Museum chhunga Thinlanga leh Phungpuinu nau rep te kha mawi hnai takin awm tawh lo mah se, ngaihtuah zui chungin a Museum pan chhukna step te kha concrete step tha tak lo ni tawh mah se, hmana cubic lung a phel, bûk deuh lak lak, rah pial mai theih lai hun te kha ngaihtuah ila, a thlang lawka Upa Laihluna Sikul kal tur phili hauh lova a liam turte kha ngaihtuahin thlir zui mai mai ila, lung a leng ngei ang.
2013 khan mi 50 dawn Thian hovin Holy Land kan zuk fang, a hlu ka ti kher mai. Kum 2000 hma lama Lal Isua pianna leh seilenna Ram, Chhangper 5 leh Sangha 2 leka mipui sangnga a hraina hmun te, Olive tlang, Gethsemani huan, thlan thisen anga a far khawpa lungngaia a tawngtaina hmun, Galili dil Petera te len denna, Pilata hmaa thi tura thiamloh an chantirna a dinna hmunah phei chuan, Kan Evangelist ropui tak tak Pi Remtluangi, Pi Lalhriatpuii te Upa Ngurthantluanga te, Nl Mimi te, Rev VL Hruaia te meuh pawh an insum zo lo. “Hei hi maw kan aiawh (Tana) thi tura i chungthu an rel tuma Pilata hmaa i dinna chu” tiin kan fawp ngawih ngawih mai zuk nia. Heng hmunah te hian Kohhran hrang hrang ten Biak In ropui tak takin an sak hnan tawh na in, a hmun leh hma a la ngai a, a hlutna a ngai reng. A hun lai ngaihtuah leh mitthla chunga han fan chu a hlu takzet a ni.
Kan hun kal tawh, kan hlim kan lawm, kan lungngaih leh mangan deuh lai te, Khawvel Sik leh Sa Fur |hal chena rawn inher chhuak thin te hian nunhlui min ngaihtir a. Heng hunah hian alawm, hla phuah leh siamtu te hian an lo phuah chhuah thin. GM High Sikul Platinum Jubili pawh hlim takin kan hmang ho ngei ang. Mahse kan inthen darh leh ang, hetiang hun angah hian DAMHAUHVA chuan
Hmangaih Lenrual dar ang kan leng za hian
|hennan kawl eng leh reng hian a mawi lo ve
Khawtlang Sirva par tlan kau iang tawh hnu
Lungrual tlaitla zankhua i var za in
Aw nunhlui a chang tur hi
Lunglen Hla Bu Pu C Vanlalsiama No 250-na keu la, chhiar la, i thiam ang tawkin sa zui rawh. Chutih pawha Nunhlui thlira i la harh (Lungleng) lo ala nih chuan Pu KC Lalvunga Essay |halfavang tih leh Pu C |huamluaian “Kan nun khuarei an chang tur chu” tih chhiar ang che. Chuti pawha rual ila pawl pha lo a la nih cheu chuan Kristian Hla Bu keu la No 333-na
A pui apang te u – A khawngaih naah hian
Tunah lokal vek ru – Kal bo leh tawh lovin
A tlai ta hle hmanhmawh ula (2)
Khawngaihna kawng an hawn
chhungin
He hla hi chhiarin sa zui zel la. Zing |awngtai leh Pavalai Inkhawm leh Hmeichhe Inkhawm thlengin kal i la, harh hun kan nei ngei ang.
Khawvel mihringte hi h un hnuaiah kan khawsa a, kan hun hman dan erawh a inang vek awm lo ve. Dam chhung ni chhiar dan erawh min zirtir turin Lalpa pawlin i bel fovang u.