Khuarel chhiatna a thlena chhanchhuaktute hman tur hmanrua sem

Khuarel chhiatna a thlena chhan
chhuaktute hman tur hmanrua sem
Disaster Management & Rehabilitation department hmalaknain khuarel chhiatna a lo thlen thulha hman tur inchhanchhuahna hmanrua chi hrang hrang chu July 11 khan sem chhuah a ni.
Hmanpuitu DM&R minister Prof Lalnilawma chuan DM&R department, State Disaster Response Force, District Disaster Management Authority leh chhanchhuah hna thawka che chhuak thin khawtlang leh NGO-te chu khawtlang thlamuantu, Zo nun zemawi tlawmngaihna leh huaisenna pholang thintute an ni tih a sawi a. Khuarel chhiatna thleng avanga hmun hrang hranga chhanchhuah hna thawktute thawmthat lehzualna tur hmanraw chi hrang hrang sem theiha ruahman a ni chu lawmawm a tih thu a sawi.
Chhanchhuah leh chhawmdawl hna thawk turin hmanraw tha a pawimawh rualin, thawktuten rilru leh taksa hrisel an neih tel a pawimawh, tia sawiin, hmanraw neih ang ang chu uluk taka enkawl a tul bakah a hun takah a nihna tur ang taka hman tangkai a nih theihnan a hmangtu turte pawhin hmanrua chi hrang hrang chu kan hriatchian a, a nihna tur taka hmanthiam a pawimawh tih a sawi bawk.
‘Search & rescue equipments’ hi Mizorama District Disaster Management Authority/ bawrhsap pisa hrang hrang, MAP leh IR Battalion hrang hranga State Disaster Response Force, Village Disaster Management Committee leh NGO – YMA, MTP hnenah sem a ni.
Khuarel chhiatna hrang hrang a lo thlen thulha hman tangkai tur hmanrua chi 24 leh ralkhel dar (siren) lian 12 leh a te 87 sem chhuah niin, heng hmanrua sem hi a bikin tuitla chhanchhuahna leh a zawn kawnga hman tur bakah khampang leh inchhawng sang atanga inchhanchhuahna tur hmanrua an ni.