Khum 100 awmna tur RIPANS Hospital sak mek larsapin enpui

Larsap Dr Hari Babu Kambhampati chuan Thawhtanni khan Zemabawka Regional Institute of Paramedical and Nursing Sciences (RIPANS) hmun a tlawh.
Larsap hi RIPANS director Dr Sanjay D Sawant leh a thawhpuiten lo dawngsawngin, khum 100 awmna RIPANS Hospital sak thara section leh ward hrang hrang an entir a. RIPANS faculty-te chuan kumin kumtawp lamah hospital hi hman tan theih a ni dawn tih sawiin, hemi kaihhnawihah hian a panna kawng siamtha turin state PWD hnenah an ngen tawh bakah power supply leh tui supply atan PHED leh P&E department puihna an mamawh tih an sawi bawk. Heng thil pathum hi state sawrkar atanga tihhlawhtlin sak an nih chuan anmahni lam chu kumin October emaw November ah chuan damlo leh a mamawhtu tan hospital hi hawn theih an beisei tih an sawi a ni.
Hospital sak mek bakah quarters, indoor sports complex, auditorium, general hostel, guest house leh academic building ho pawh larsap hian a enfiah a ni.
Tuna khum 100 awmna RIPANS Hospital hi nakin lawkah chuan India rama sawrkar damdawi in tha filawr – AIIMS Delhi anga tih changtun a nih a beisei thu Dr Hari Babu Kambhampati hian a sawi a. Mizoram tan chauh ni lo, hmarchhak bial pum tan healthcare sector-ah service quality tha zawk a belhchhah dawn avangin lawmawm a tih thu a sawi bawk.
RIPANS hi kum 1995- 1996 a North Eastern Council hnuaia din a ni a. 2007 April 1 khan Ministry of Health & Family Welfare-ah sawn niin, tunah chuan he ministry-in a enkawl bik institute awmchhun a ni tawh.