Kim Kardashian-i’n amah rawktu mittui tla chungin a ngaidam

Kim Kardashian-i’n amah rawktu mittui tla chungin a ngaidam
2016 khan Paris-a a thlenna hotel-ah Kim Kardashian chu misualin luhchilhin an rawk a, a tlereuh man to tak tak an ruk sak a, Kim-i hi phuarhlawmin an kalsan kha a ni a, he thubuai kal zelah hian May ni 13 khan Kim hi Paris-ah court-ah a inlan a, court chhungah amah rawktu Aomar Ait Khedache chu a ngaihdam thu a puang.
Court-ah hian 2017-a an man hnua Aomar Ait Khedache, kum 69-in a thiltih sual avanga pawi a tih thu a ziah chu chhiar chhuah a ni a. He inrawkna thubuaia court chhunga thiam loh thu puang a, Kim hnena thupha chawitu awm chhun Aomar chuan, “Nang leh i pasal, i fate leh nangmah hmangaihtu te natna ka thlen avangin pawi ka ti takzet a ni. Ka thil tih tawh kha siamthat theih a ni tawh lo, mahse, he lehkha hian i thil tawn avanga i nuna hlauhthawnna leh thlaphanna keimah avanga i neih phah te a tihzia theih ngei ka beisei,” tiin a ziak.
He lehkha hi an chhiar chhuah laiin Kim chu a tap ta a, a tah chhan an zawh chuan, “Ka rilru a khawih riau a ni, he ka thil tawn hian ka nun mai bakah kan chhungkaw nun a tidanglam nasa lutuk a,” a ti.
Aomar hi tunah hian a taksa hriselna a tlahniam a, a beng a ngawng a, a tawng thei tawh lo. Kim chuan Aomar chu, “I thuziah hian min ti lawm, kha thil thlengah khan ka ngaidam che, mahse, ka rilru hrehawmna leh hlauhthawnna ka neihten ka nun an tihdanglam tak vek hi a siamtha leh thei tawh si lo,” a ti.
Kim Kardashian hi October ni 3, 2016 khan Paris-a a thlenna hotel-ah silaia tin chungin rawk a ni a, a tlereuh dollar maktaduai 10 chuang man an ruk sak a ni.
Kim Kardashian hi Paris court-ah hian tleureuh dollar maktaduai 8 man inbelin a inlan a, he inrawknaah an ruk sak, chutih laia a pasal Kanye West-a pek, 20-carat lunghlu zungbun nena inang deuh chiah, Briony Raymond emerald-cut diamond zungbun lian tha zet mai bunin, 18-karat white gold ear cuff nen a inbel a, lunghlu thi leh bengbeh chi hrang hrang inbelin, thawmhnaw dum hlang a inbel bawk.