Kim lo hma hle chunga chak tho PSG

Kim lo hma hle chunga chak tho PSG
Le Havre khelmualah leh nghal tan atanga minute 10-na lekah an goalkeeper Gianluigi Donnarumma hnawhchhuah-sak an ni chungin Paris St-Germain chuan 2-0 hnehna nuamsa pangngai tak nen Ligue 1 table-a an hmahruaina an sawhnghet deuh deuh.
Penalty box pawna tlan-chhuak chunga Josue Casimir tlan lai a tihtluk avangin a career-a a vawikhatna atan Italy na-tional football team goalkeeper ni bawk Donna-rumma chuan red card a chawi a; a tam zawk an nihna hi Le Havre lamin an hlawkpui zo lo ni mai loin minute 23-na lekah Kylian Mbappe chuan Dembele siamsak atangin mikhual hmahruaina goal a khung, goal ban fuh chunga a goal thun kha season kal laia a goal 15-na a ni tawh nghe nghe.
PSG goal hnihna hi hun pangngai tawp hma minute khat chiah awm tawha Vitinha khakluh a ni.
Hnawhchhuah tawk Donnarumma aiawhtu goalkeeper Arnau Tenas tan Pathianni zan inkhel kha a professional debut niin, goal a chhuah lo a, inkhelh banah PSG boss Luis Enrique chuan kum 22 mi goal ven dan a fak.
Enrique chuan a team-te rilru paukhauhna leh team spirit fak telin, hun khirhkhan leh game-a an beisei loh pui an tawn laia an insiamrem theihna a chhuang hle tih a tarlang tel a, an chance hmuh an bawhpelh tam thu leh an lama lut tur Arnau dan a sawichhuak bawk.