Pathumnaah Barca tawlh chho

Darkar chanve khelh tlin hma lawka Joao Felix goal khat thun chakpuiin Barcelona chuan an mikhual Atle-tico Madrid lakah 1-0 hnehna an sualchhuak thei hram a, La Liga table-ah pathumna din-hmun derthawng tak inchuhnaah Catalan team dingchangin, Mad-rid club hi palinaah an chhuk leh ta rih a ni.
Portuguese forward Felix hian karliamta Thawhlehni pawh khan an ram club FC Porto laka goal pawimawh khungin Catalan team chakna goal a lo thawh tawh a, a zawnin chakna goal a thun a, Nou Camp club tan a thawhhlawk tluang zel.
Pathianni zan inkhel minute 28-naa chep tak atanga Jan Oblak dan zawh loh goal khungtu Felix kha Atletico atanga season khat chhung atan loan-a Barca lamin an sengluh niin, a club dik takte tlawmna goal a khung a; Memphis Depay pawhin Atletico siphurh sutna goal a club hlui lakah a thun teuh hle a, mahse, a free-kick chhuih chhe lo zet kha Barcelona goalkeeper Inaki Pena chuan a dansak hlauh a ni.
Barca lam pawh hian goal thun belhna hun remchang tha tak tak an nei nual a, mahse, Robert Lewandowski ngawt pawhin a chance tha hmuh a hloh nual a, goal khat bak lawm tur an nei ta lo a ni.
Reigning champion Barcelona hian Atletico Madrid chunga chhoin Spanish La Liga table-ah pathumna luah mah se point li laiin pahnihna Girona leh hmahruaitu Real Madrid an la thlau.