Kim Sae-ron thih chhan- mahni intihlum

Kim Sae-ron thih chhan- mahni intihlum
February ni 16 a a chennaa thi a an hmuh Korean actress Kim Sae-ron, kum 24, thihchhan chu mahni intihlum (suicide) niin Seoul-a Seongdong Police leh Yonhap News Agency ten an tarlang a, Kim hian lehkha engmah hnutchhiah a nei lo niin Yonhap chuan an tarlang bawk.
Netflix series Bloodhounds star Kim Sae-ron hi a ina len tum a thiannuin Pathianni kalta khan thiin a hmu a, police te pun nghal an ni a, a tirah pawh police-te chuan midang kut tuara thi a nih theihna awm hnuhma an hmuh mai loh thu an lo puang tawh a, tunah chuan a thih chhan hi mahni intihhlum a nih thu an puang chiang ta a, mahse, engtianga intihlum nge a nih tih erawh he thu buatsaih lai hi chuan puan a la ni lo.
July ni 31, 2000 a Seoul-a a piang Kim hi hmeichhe naupang kum 8 mi chauh a nih lai atangin lemchan khawvelah a inhmang tan tawh a, 2009-a tlangzarh A Brand New Life-ah changin, 2011-ah I Am a Dad-ah inlan lehin, 2014-ah A Girl at My Door leh 2018 The Villagers-ah te changin, film hrang hrang The Man From Nowhere, Listen to My Heart, The Queen’s Classroom leh Love Playlist ah te pawh a inlan. Kim hian A Girl at My Door avangin Blue Dragon FIlm Awards-ah Best New Actress a dawng a, The Man from Nowhere avangin Korean Film Awards-ah Best New Actress a dawng tawh bawk.
TV lamah pawh a hlawhtling viau a, Glamorous Temptation, Mirror of the Witch, Leverage (South Korean version), Excellent Shaman Ga Doo Shim leh Kiss Sixth Sense-ah te inlan lehin, 2023 khan Bloodhounds series-ah a chang leh ta a ni.
2022 khan rui chunga lirthei khalh avangin man a ni a, hemi tum hian guardrail leh transformer a car-in a su a, won maktaduai 20 (Rs 12,04,400 vel) chawi tir a ni. Hei hian a lemchan khawvel a tikhaihlak ve deuh a, SBS drama Trolley-a a role pawh a chawlhsan a, mahse, 2023 khan Netflix series hlawhtling tak Bloodhounds-ah a rawn inlan leh ta a ni.