King of Queen’s Alcaraz

Wimbledon inbuatsaihna tourna-ment ngaihlut hlawh Queen’s Club Championships-a a chhuah vawi-khatnaah Spanish player hming chher chho kal mek Carlos Alcaraz a cham-pion a, he hlawhtlinna avang hian ATP ranking-ah Novak Djokovic lehpelin World No 1 nihna a luahkir zui nghal.
Queen’s Club, London-a Pathianni final inkhelah kum 20 mi Alcaraz hian 6-4, 6-4-in Australian player Alex de Minaur a hneh a, a chhuahsan tawh world number one nihna vuan lehin, thlathar tira khelh tan tur Wimbledon atan rinkai pakhat zingah a intatlut nghet sauh bawk.
Tun kha grass bika tournament a khelh vawithumna leh grass-court title a sualchhuah tum khatna niin, London khaw grand slam tournament-ah rinkai ber Djokovic hmakhalhin seeded number one a chang dawn.
Final-a chak zo ta lo De Minaur kha kum 2006-a final lo khel ve tawh Lleyton Hewitt hnu lama Australian zinga he London final khel leh thei hmasaber niin, thahrui ngah tak Spaniard a ngam lo.
Alcaraz kha Spanish player zinga Wimbledon inbuatsaihna tournament ngaihhlut hlawha champion thei palina niin, kum 2008 daih tawha Queen’s title lak hnua Wimbledon-a champion zui leh Rafael Nadal-a kalkawng zawh ve turin beiseina a nei mek.
Pathianni final-a hnehna a chan hnu court chhunga an kawmnaah reigning US Open champion Alcaraz chuan, “He hmunah hian legend tam takin hnehna an lo chang tawh a, trophy-a champion ropuite kianga ka hming a chuang ve ta mai hi a mak a ni.
“Ka career-ah match 11 chiah grass court-ah ka la khel a, tawnhriat tam zawk, darkar tam zawk ka la mamawh a, chuti chungin tun tournament-a player mak leh ropui ka paltlang zozai leh ka khelh dan level ka thlirletin kan hma Wimbledon-a champion thei tur zingah hian ka inrinlut ve lo thei lo a ni,” a ti ngam.
July ni 3 atanga khelh tan tur Wimbledon-ah hian Novak Djokovic chu champion tura rinkai ber la ni reng mah se nikuma fourth round chauh thleng pha Alcaraz chu top seed luahtu tur niin, mipa zinga grand slam singles title la hnem ber Serb tana tukzal ngai khirhkhan ber ni tura beisei a ni.
Nadal bakah Queen’s Club title lak hnua Wimbledon-a champion zui ta player awm tawh zingah Andy Murray (2013 & 2016), Pete Sampras (1995 & 1999) leh Lleyton Hewitt (2002) an tel a; Boris Becker pawh kha rawlthar a nih laiin kum 1985 khan London tournament lian pahnihah hian a lo champion zawn ve tawh bawk.
Queen’s Club final-a chak zo ta lo world number 18 Alex de Minaur pawh kha kum 24 mi chauh la niin, hmalam hun nei eng pawl zinga chhiar a ni a, first round-a tualchhung tlangval rinkai Andy Murray paltlang thei a nih avangin Wimbledon-ah pawh hian thleng sang pawl ni pha tura ngaih a ni.