Kiren Rijiju sawiselnain vawm zui zel

Opposition leader-te chuan Kiren Rijiju Ministry of Law and Judiciary portfolio an chhuhsak tak chu sawi zuiin ‘Law Minister hlawhchham’ an ti.
Lok Sabha member leh Congress leader Manickam Tagore chuan Rijiju chuan judiciary bei zawkin Congress chief hlui Rahul Gandhi chu a sawisel reng a ti bawk a.
“Law minister hlawhchham a kiang ta…Earth Science-ah eng nge a tih ang? Tunah chuan Arjun Ram Meghwal an law minister zahawmna angin a che turah ngai ang,” tiin Tagore chuan a sawi.
Abhishek Singhvi, senior Supreme Court advocate leh Congress member, Rajya Sabha ni bawk pawhin, “Khawvela party lian bera inchhalin Law Minister full time tur pawh an hmu zo lo. Hei hian treasury bench ah talent tlakchhamna a pholang mai ni lovin, sorkar laktlak lohzia a pholang a nim” tiin a sawi bawk.
Law Minister hlui Kapil Sibal pawhin, “Law ni lovah, tunah chuan Minister of Earth Sciences. Dan kaihhnawiha science te hi hriatthiam awlai a ni lo. Tunah chuan law of science a buaipui tawh ang chu,” tiin a sawi bawk.
Bahujan Samaj Party MP Danish Ali pawhin, “7th February 2023 khan Lok Sabha-ah na takin Kiren Rijiju-an judiciary a sawiselna ka khak let tawh a, mahse, a hun takah sorkar a inrawlh duh lo. Vawiinah erawh hnawl a ni ta a. A tlai tawh a, institution siamthat theih mai lohin a tichhe zo tawh,” tiin a sawi.
Shiv Sena (UBT) leader leh Rajya Sabha MP Priyanka Chaturvedi chuan, “Maharashtra judgement a zahthlak em vang em ni? Nge ni a Modani-SEBI investigation vang,” tiin a sawi ve bawk a.
Shiv Sena (UBT) leader Sanjay Raut chuan Central sorkar chuan judiciary-in Kiren Rijiju laka an lungawilohna a ngai pawimawh a, Law Ministry atangin a paih a. Hei hi judicial system tana chakna a ni, tiin a sawi ve thung a.
Raut chuan Narendra Modi sorkar-ah law portfolio enkawl thei tur mi laktlak an awm lo a ti bawk a. Rijiju chu judiciary kaldanah inrawlh tumin Chief Justice of India D.Y. Chandrachud leh midang te pawh a hmusit a ni a ti bawk a.
“Judiciary system pum hi Minister kalh a ni a, chu chu sorkarin a ngaihai thei ta lo a ni. Hei hi judicial system tana chakna a ni,” tiin Shiv Sena (UBT) thupuangtu chuan a sawi bawk.
Nationalist Congress Party (NCP) chief spokesperson Clyde Crasto chuan Rijiju chuan dan chunga len a tum a ni a ti a. A chhuak ta hi Union minister dang te tan pawh entirna tha tak a ni a. Central sorkar hian minister tha lote tan tehna a siam a ngai, tiin Crasto chuan a sawi bawk.
Rijiju paih a nihna chhan hi a awm nuala ngaih a ni a, Uniform Civil Code kalpui muan pakhat vang niin UCC hi BJP tena ideological issue pawimawh zual pathum an neih zinga pakhat a ni a, a dangte chu Jammu and Kashmir special status thiah te leh Ayodhya-a Ram Temple sak te niin hengte hi chu an kalpui mek tawh a ni a. Sorkar ber chuan Lok Sabha inthlan kum khat chauh a awm tawh tihah Rijiju hnawla kal chu tulah a ngai a ni ber.
Rijiju hian langsar takin judiciary dinhmun sanga judge te ruattu collegium system nasa takin a sawisel a. Chumai bakah Supreme Court judge rual chawl tawh te chu ‘anti-India gang’ tihialin a sawi a.
National Judicial Appointments Commission Bill, 2014 chu lungrual takin Parliament-in a pawm tawh a, State 29 zingah 17 tena an pawmpui tawh laiin Rijiju thusawi hian Opposition leader te rilruah ruling party chuan judicial appointment-ah thuneihna chan an tum anga ngaihna a piantir phah bawk a ni.
Meghwal an Rijiju a thlak takah hian a tum khat nan Law Ministry chu Cabinet Minister ni lovin a enkawl tumkhatna a ni ta bawk a. Meghwal thlan a nihna chhan hi Rajasthan-ah IAS officer ni reng tawh niin administrative experience nei tha a ni bawk a, Rajasthan hian kumin kum tawp lamah inthlan a hmachhawn dawn a ni.