KMMTTP-in a nghawng tur leh lo hmachhawn dan tur..

Tun hnaia Lawngtlaia Central Young Lai Association (CYLA) buatsaih Kaladan Multi Modal Transit Transport Project (KMMTTP)-in a nghawng theih tur sawi honaa T. Lalhlimpuia, MLA, Chairman, KMMTTP Study Team-in “He project-in a ken tel, hna hniam zawk thawktuah ringawt kan tang ang tih a hlauhthawnawm” a tih kha a dik a, Mizoram mipui rilru pawh a ni.
He project-in a rawn ken tel tur hamthatna kan lo tel ve theih dan tur ngaihtuah hi tihmakmawh chu a ni teh meuh mai, chutih ruala pawimawh em em pakhat chu, kan rilru sukthlek khalh ngil hmasak hi a ni.
Sairang thlenga rel lu lo lut tur kha kan lo hmuah chhung a rei hle a. Kum engemaw zat kan inbuatsaih a, rel a lo lut a, mahse kan lo inpeih lohzia a lang a. Kan ngaihpawimawh em em ILP counter kan lo buatsaih dan te, bungraw dahkhawmna tur te, rel station leh khawpui chhung inkalpawhna transportation system te, thil dang dang pawh a awm nual. Hei hi ‘Sairang Precedence’ a ni.
KMMTTP hi Sairang aia lian leh hlauhawm zawk a ni. Kan sawi rikna a rei tawh, study team din a ni a, mahse commission han ni chiah sela, ‘chu chu, kha kha’ tih tur a awm leh tho ang. Sairang Precedence hre rengin, a hma aia nasa zawka kan inbuatsaih uluk a ngai a ni.
Pawn lam aiin chhung lam a pawimawh. Project hamthatna kan sawi rualin pawn lam mite bawih-a kan tluk luh loh nan fimkhur a ngai. Eng anga hlawkna nasa pawh ni se, ram leh hnam tana derthawng thei thilah chuan ‘No’ ti ngam turin tun atangin kan inzirtir a tul a ni.
Tuna kan dinhmun hi en ila, chimral kan hlau a, mahse chimralna kawngka chu keimahni ngeiin kan hawng mek si a nih hi. Kuhva rah leh hnah atangin hnamdangin kan dawr kawt an rap a, an rap thuk tial tial a, tunah chuan eichawp dawr, cement dawr, hardware dawr pelin Mizo filling station ngei pawh hnamdangin an vil tawh a nih hi. An chak vang ni lovin, keimahni kan dawrh zau lutuk avangin min bawh bet tan chu a ni deuh ber tawh a. Hming hawh (benami) system hi a bul a ni. Heti hian zawi zawiin min kherh a, min kherh nghet tial tial ang a, nakin lawkah min kherh tlu ang a, kan chungah an bawk tawh mai dawn a ni.
He practice hi KMMTTP hian chhim lamah a hring ve lovang tih sawi theih a ni lo. Tun atanga kan inven lawk loh chuan, Paletwa atanga thil rawn lut tur kha Mizo kutah ni lovin, hnamdang kutah a lut leh mai dawn a ni.
Indo-Myanmar border trade pahnih – Moreh leh Zokhawthar – hi lehkha-ah chuan Land Customs Station ve ve an ni. Mahse Moreh-a formal trade a kal laiin, Zokhawthar-ah hi chuan a hmingin Land Custom Station chu a awm a, formal trade erawh a awm lo tluk a ni a, informal vek a la ni.
Zorinpui-ah hian Zokhawthar model hi hman theih a ni lo a. A chhan chu agreement-in a huam loh bakah, kan ral lehlam hi Myanmar sawrkar awp a ni tawh lo a, Arakan Army thuneihna hnuaia awm mek a ni. India sawrkarin Arakan Army thuthlung a siampui a rinawm loh avangin, Zokhawthar anga maimitchhinga kalpui leh nawk nawk a nih chuan state sawrkarin chhiah leh hamthatna hrang hrang a hmuh tur ang a hmu leh chuang dawn lo a ni.
Chuvangin Zorinpui Trade Protocol hranpa siam a ngai a. Zorinpui hi border haat mai ni lovin, immigration, customs, quarantine, bank leh security awm kimna Integrated Check Post (ICP) puitling anga puan a ngai a, state sawrkarin Central lam a nawr a ngai.
A tawp berah chuan, he project hmachhawnna kawngah hian pawn lam aiin chhung lam inbuatsaihna a pawimawh hmasa zawk tih a lang a. “Keimahni hi inveng hmasa ang u” tih hi KMMTTP lo hmachhawn kawnga kan au-hla (slogan) atan kan hman a pawimawh dawn a ni.