Social media lama mawi lo taka hmeichhiate an inlan thin chu ngaimawhawm tiin Kohhran Hmeichhia chuan hetiang hi laka hmeichhiate an fihlim deuh deuh theih nan inzirtirna kalpui a rel.
Mizoram Presbyterian Kohhran hnuaia kohhran hmeichhia chuan March 10-12 chhung khan Darlawnah inkhawmpui lian vawi 50-na an hmang a. Inrinni khan rorel inkhawm neiin, social media-a mawi lo taka hmeichhia inlan lo tura inzirtir nise, an ti.
Rampum huapin hmeichhiaten puan bih uar tura inzirtir, Pathian biak inkhawm uar tura inzirtir, nula tlangval leh tleirawlte enkawl kawngah ram pum huapa inzirtir, ruihhlo leh mipat hmeichhiatna hmansualna laka tu leh fate an fihlim theihna’n ram pum huapa hma lak, tih te chu an rel zingah a tel.
Kum 2022- 2023 chhunga Central Kohhran Hmeichhia sum hmuh belhkhawm chu Rs. 39,74,073 a ni a; 2023- 2024 budget atan Rs. 44,89,000 pawm a ni.
Kum 2024 Kohhran Hmeichhe Rorel Inkhawmna atan Dawrpui Kohhran biak in ruat a ni a, March 8-10 chhunga neih tur a ni. Kum 2025 Hmeichhe Inkhawmpui Lian chu March 7-9 chhungin Thenzawlah neih a ni anga; kum 2026 Rorel Inkhawm chu Champhai Vengthlangah March 6-8 inkara neih a ni ang. Kum 2027 lnkhawmpui Lian chu N. Vanlaiphaiah March 12-14 chhungin neih a ni ang.
Kristian chhungkua dinhmun tehnaah, kum 2022 chhungin nitin chhung inkhawm zaah zaa nei thin N. Khawdungsei leh Phainuam Pastor bial an ni a, chhungkua zaah za in buhfaitham an tham thei bawk.
Kum 2022 rampum huap Kohhran Hmeichhe inchhiarnaah bial leh kohhran mal zawmtu 216 an awm a, Kohhran leh Branch Church 976 a ni. Chhungkua 117455 an awm a; nitin chhung inkhawm nei thei chhungkua 81030 (68.83%) awmin, buhfaitham tham ziah chhungkua 116012 (98.54%) an awm a ni. Kohhran hmeichhe member 192490 an awm a, kohhran hmeichhe inkhawm la nei thei lo kohhran 55 an awm.
Kohhran Hmeichhe Inkhawm Lian vawi 50-naah hian thupui “Pathian nena len dun” Mika 6:8 tih hmangin Synod executive secretary i/c Kohhran Hmeichhia Rev VL Luaia Hranleh chuan Pathianni chawhma leh chawhnu inkhawmah thu a sawi a. Pathianni zan inkhawmah Kohhran Hmeichhe chairman kalchhuak tur Sailuti chuan thu a sawi a ni.
Pathiannni thleng khan inkhawmpui palai chhinchhiah zat chu 10077 an ni a. Central Kohhran Hmeichhe hruaitu tura ruat leh thlante chu – Chairman – Zothanpari (Synod thlan), vice chairman – Dr Lalthansangi Fanai, general secretary – H Lalfakmawii (Synod ruat), asst. secretary – Lalmuanzuali,
treasurer – Zothansiami, fin. secretary – R Lalrempuii an ni.
Kohhran Hmeichhia-in social media-a hmeichhe inlan dan mawi lo ngaimawh
Get real time updates directly on you device, subscribe now.
Next Post