Kohhran hrang a va tam em!

Lalchhandama Colney
Ph – 9862982321

Mizote chu hnam la upa vak lo kan ni a, kan thil thlir dan, hmuh dan, ngaih dante pawh tlema la puitling vak lo turah indah ila. Hetih lai hian hnam fing leh upa em em zawkteah pawh hian ngaihdan, thlir dan, hmuh dan chi hrang hrang hi a awm tam ve tho aniang, kohhran/pawl hrang hrang hi a awm tam ve tho mai, an niah phei chuan Pathian awm ring lote pawh hi an kat nawk a nia, ngaih dan mumal em em nei lote pawh hi an awm nual zawk ve tlat mai. Keini zingah hi chuan Pathian awm ring lo, ngaih dan mumal nei lo tih ang chi te hi kan nei lo zawk daih a ni. Sakhuanaah hi chuan saphote pawh hi kal sual ve tak tak chanchin kan hre nual hlawm tawhin ka ring. Chuvang chuan, kohhran/pawl, kan ngah em em mai hi kan indem ngawt thei bik lovang, mite pawh an lo ni ve tho mai, tih hi kan hre thei awm e. Chhiarpui hnuhnung berah khan nuaih sawmpakhat vel bawr kan ni a, nikum inthlan dawn khan vote nei thei(Puitling) kha nuai riat singnga chuang kan ni a, Mizote, Mizoramah. Kohhran Chanchin
Kohhran rawn dintute hi sap missionary, a tirah chuan baptist lam leh presbyterian-te an ni. A hnu lamah hian Chhandamna Sipai pawl, Adventist-te leh a dangte an lo lut zel a. UPC, an lo awm a, IKK, Roman Catholic, an lo awm belh zel a, UPC, an han inthen darh a, chutiang bawkin Chhandamna sipai pawl pawh hman ni lawkah. Mahni kohhrana duh khawp lo, tlan chhuak a, pawl dang din an awm zel bawk a, vawiinah chuan pawl/kohhran, kan tih ang chi hi Mizoramah 70/80 vel lai a awm an ti tawh a ni. Mahse, heng zingah hian a tam zawk hi chu hriat ngai mang loh, zuitu pawh tlemte chauh te an ni hlawm.Kan hriat theuh angin vawiinah chuan veng tinah biak in 3/4/5 dawn lai awmnate pawh a awm tawh, kan thang nasa hle mai. Lo haw lo sela, Bawngkawn, tun hma, awm lo a awm lo, Pathian chauh a awm lo, an tih thinnaah pawh khuan, vawiinah chuan presbyterian biak in ringawt pawh khu sawm dawn lai a awm tawh a ni, pawl dang nen phei chuan a tam cher cher tawh khawp mai, bang loa tawngtai thin te leh mi thahnemngai dangte thawhrimna rah a ni ngei ang. A Tam Chhan
Puitling, vote nei thei chin pawh mi nuai riat leh singnga chuang vel chauh kan ni a, engati nge heti tak maia kohhran/pawl kan tih ang chi hi a tam em em mai chu le? Kan kohhran hruaitute nge, Pastor lam ho hian an zir lo viau em mi ni ang le? Leh lamah chuan Bible pawh hian eng thlarau nge in chan, infiah thin rawh u, min ti; thlarau chi hrang hrang hi a tam ve a ni ngei ang. |hen khatah chuan Bible thute pawh hi a then lai kan la vung a, a chang phei chuan kan duh duhna laiah kan rek bung mai thin, chuvang chuan, Bible sawi tum ni awm tak ang si hian keimahni duh danin kan lo kalpui ve daih thin bawk. Nge ni, Mizote zingah hian, kei ka ni, inti tawk hi kan lo tam ve viau zawk. Hetia a lan dan maiah hi chuan Bible inang hmang mah ila Pathian thu kan hmuh dan, rin dan, pawm dan hi a inang lo, a then lai kan la uar a, an lo uar ve lem lo a, lak vung lai deuh te pawh kha a inang lo hlawm nuaih a ni ber mai e. A tawp berah chuan Setana hi phuarbehin a la awm lo, a duh duha chet theihna a la nei, heng avang hian kan fimkhur em em a ngai, nih loh chuan kan inpumkhat thei lovang, Pathian hnaih a awm a harsa ang.
A |ha Zawk A Lawm
Nia, thlir dan chi hnih a awm thei a, a êng zawng leh a thim zawng. Mizoramah pawl/kohhran chi hrang 70/80 vel bawr a awm tih kan hria a, heng pawl hrang zat atang hian Mizoram mipui zat hi han sem ve leh ta ila, chuta tang chuan kohhran hruaitu, thalai, hmeichhia, pavalai thlengin, OB leh committee member chin ringawt pawh thahnem tak an ni ngei ang. Heng bakah hian inkhawm ngaina mi, Bible ngaisangtu, tawngtaimi leh a dangte pawh eng emaw zat awm turah ngai ila. Heng mi zawng zawng atangte ringawt pawh hian Mizoram chu nuam tak a nih phah ngei ang. Chuti ni lo se chuan,chuang kan tam lutuk anga,phuartu neih loh hi chuan nun te pawh hi thlahdah a awl a, pawl hrang hranga kan awm erawh kha chuan chuang kha kan awm mang dawn lo a ni, chuvang chuan, mi tha tak tak a tam theih zawk daih lovang maw aw, ka ti. Chhungkuate pawh hi a indang thei an awm chuan puitlin zirna zel a nia, tha khawp mai, thil nih dan tur pawh a ni zawk a. Khawtlang kan nunhonaah erawh pawlte deuh chu hriat an hlawh lo khawp mai, an khawhawi pawh a zau vak lo em maw ni chu aw, a tih theih.
Pawl/Kohhran hrang hrang heti tak maia a tam hi tuman mak lo pawh kan tih ka ring lo ve. Mipui nuai sawm hnih pawh tling lo zingah heti zah zah han awm hi chu a mak kan ti dawn nge, zahthlak te pawh zahthlak ve deuh rohin ka hria. Sakhuana kan la thutak hle a, mahse, mahni ngaihdan dana kal,ka thlarau dawn, min pek, tih lam vel hi kan ngai pawimawh mah mah em mi aw ni ang. Bible-te hi Pathian thawk khum a nih angin zir ve fe a ngai a, a then lai te phei hi chu a nih ang anga pawm mai loh chi, thukhuh taka ziak lai te pawh hi a awm a. A sawifiahna tel lo chuan Juda-ho history, culture, tih mai tur a ni, thu hlui lutuk tawh, tunlai tawh lo tih mai tur a ni. Mahse, a zir mi tena an han sawi fiah erawh chuan a awm in, a mam leh thluam thin. A ni tak a, thlarau thianghlim tel lo chuan awmzia a nei thui lutuk thei lo, a tel erawh chuan tlar khat lek pawh hian rei lo te chhungin mihring nun pumpui hi a thlak dang lam vek thei ve thung.
Aw le, lo duhtawk dawn ila, kan rama heti tak maia pawl/kohhran hrang tam lutuk hi chu mi tin te, kohhran hruaitute leh kan puithiam hote kan inenfiah theuh a tul awm mang e, ka ti.