Lallunghnema
Charity Lodge
-9862288182
-- Advertisement --
Kum 100 chuang teh meuh kristiannain min luh chilh hnu hian kristian ramah he Mizoram hi kan inchhal a. Mahse hnam tlem zawk leh tenau zawkte avangin 100-a za chu kan tling tawh lo hle mai a. Zaa sawmriat chuang awrh chu kristian kan la ni a. Mizoramah hian kristian ni lo 15% vel an awm mek tihna a nih chu!. Ram chhung mission rawngbawlna pawh kan uar sauh sauh a tul ta. Heng ti thei tur hian non-mizo Mission Service kan tihchak a tul hle lo maw? Mizoramah nuai engemaw zat kristian ni lo, Isua ringlo an cheng mek a, kan veng mai ni lo, kan thenawm hnai te teah Non-Christian an awm teuh mai a. Thir chhe zawng Non-Christian ni tin, tuk tin hmuh theihin khawlaiah an kal sup sup a. In sa apiangin vai kan ruai a, heng kan vai mistiri te hnena Lal Isua chanchin thahnem ngai taka hrilhtu kan awm mang lo niin a hriat! Dik pawh a dik thawkhat ang.
Hmanni lawk khan Kohhran pakhat chuan an Biak in satu vai te hnenah Lal Isua Chanchin |ha an hrilh tih thu erawh ka lo hria a. Lawmawm ka ti hle mai. Ni e, kan chanchin lawmawm dawnte hi, “Chu mite Kohhran chuan an vai hnathawk rawihte chu Pathian thu an hrilh thin a. Vai mistiri hovin Baptisma an chang nasa mai”, tih ni se kohhran ho hi kan va inhmeh dawnin, a va lawmawm dawn em! ka ti a ni.
Mahse tunah hi chuan vaiho hnen thleng phak khawpin Chanchin |ha kan pe chhuak lo a ni, tih hi a chiang em em a ni. Kohhran Upa hovin Biak In saknaa an vai rawih, vai mistiri chu Pathian thu an hrilh thin a, Kristiana a la inpek ngei a beisei awm tihte hi ni thin se, kan va inhmeh khep khep dawn em? Kan titi ni thin bawk se, kan va ti em! Mahse, tunah erawh vai mistiri, Isua nei loho hi kan vei lem lo. Kohhran hian Lal Isua la nei lo kan vai mistirite hi i vei tak tak ang u. I kiangah an awm e.
Hetih lai hian….
Hei hi ka ngaihtuah, kan thupui hi.. Kohhran memberte hi kohhranah chauh kan rinawm ta em ni? Kan ni tin chanchin thar hriatte hi a va kristian lo sawt ta em! Kan eizawnnaa therhlo kan buaipui dan em em hi!
Sawrkar hnathawk zingah inthlahdah an pung nasa hle. Hun vawn dik leh hnathawk thaa inelnate hi a awm ta meuh lo em ni? Pisa kal tlai te, pisa ban hmaa bang thin hmel hmuh te hi kristian nun nen a inmil mawlh si lo a ni. Hnathawktute zingah thawk chhe lutuk hmuh a ni thin hi tute mawh nge ni ang le? Kohhran mipuite an ni dawn lo em ni?
Biak Ina inkhawm tlai ngai lo, Office tlai tradition-a neih ta tlat thin hi hna thawktu zingah hian a sang a sang an awm ngei ang! Hlawh tam uma tlan chak em em, hna thawh that lam kawnga tlan muang hle si, kohhran mi zingah an ngir khup mek bawk a ni!
Pathiannia rinawmna thupuia neih, thawhtanni a lo thlen veleh a, Office service chhe em em, rinawmna tlanchhiat san ching hi sawrkar hnathawkte zingah engzat tak awm ang maw!
Kristianna hi Biak In compound leh kohhran activity-ahte chauh em ni kan nunpuiin kan hrilhfiah dawn le?
India Consitution-in a huat em em laina hnai duhsakna hleihhluak invulhte (nepotism)te hi kan van uar tehlul em? Sawrkar hnathawkin sawrkar zar zo tura a laichin hnai te a vulh thin dan te, Minister-in a chhungte sawrkar thau a sawhtir thin thu te hi media-ah kan lo hmu chuai chuai mai! Tak tak ni lo hram se, mumang mai ni se, kan va ti em. Minister pakhatin a chhungte pawisa nuai tam tak a kawl tir tih thu thang te, Minister pakhat chuan a fapa company hna a pe tihte hi a va Kristian lo rem rem ve! Minister unaupa pakhat chu criminal case avangin Police-in an man a, a tukah bail- in a chhuak leh tihte hi Kristian rinawm lo chanchin a ni. Office pakhat chuan a department-ah mi hmingin supply a ti thin a, officer pakhat chuan a chhungte hna a pe thin tih te hi sual a ni lo em ni? Kohhranah hetiang hi a thleng ve ngai em? Kohhran hnuaia construction work-te hi tihchingpen a ni ve ngai em? Kohhran hruaitute hian an chhungte an duhsak bik thin em? Kohhran Upate hian an kohhran sum an ti chingpen ngai em? Kohhranah chuan a, “thianghlim” tih a ni ang.
A nih leh, chung Kohhrana thianghlim taka awm leh che thin, Thlarau Thianghlimin a sawi chet hote hi anmahni kohhran pawn lamah an rinawm zui zel ta em? Kohhran Upa thawhna office chu a thianghlim bik em? A fel fai tha i ti em? Chung Kohhran Upa leh rawngbawltute hna chu a tha deuh bik em? Kohhran Upa chu biak a nuam em? Entawntlak a ni em? Kohhrana rawngbawltu chu entawn tlak a ni em? A eiruin miin an hria em?
Kohhrana rinawm taka rawngbawlna kawnga fel em em thinte chu an hnaah an rinawm zui zel em, tihte hi zawhna hrawl tak a ni a, ‘ni lo’ ti leh ‘ni’ ti kan inthen phawk. Mahse he thuziaktu chhanna erawh chu Kohhran rawngbawlna pawn lamah erawh kan rinawm lo tih hi a ni mai. Politics chhe chi ber kan khel a, infak aiin indem nuam kan ti zawk. He ram hi Pathian fa inti politician rorelna a ni si. Lal chakin kan thaw huam huam a, thuneihna thlakhlelh vangin mipui hnenah inzuarin thil theih loh kan tiam a. Dawt sawi hi thisenah kan than hnan a. Pathian thu kan kawrah kan hmang a. Eng hmanrua pawh kan hmang duh ta a ni ber mai. Silai kan la che lek em lo! Mipui sum mipui hnenah kan sem a…. mipui kan lawm zaw mah a nih hi!
He thu ka buatsaih lai hian India ram State zawng zawng zingah Mizoram hi State Hlim bera thlan a nih thu thian thenkhat sawi ka lo hria a. Kei chuan State Hlim ber han nih ngawt mai chu ka zak viau zawk a. Kan politics khelh dan han ngaihtuah leh mipuiin dan leh thupek kan zah lohzia han thlirte, corruption nasa em em, hlemhletna nasatzia han thlirte hi chuan State Hlim ber nih hi kan phu hlawl lova, kan inhmeh lo em em a ni, ka ti a ni. Mahse….kan ni miau si! State dang hi an va hlim lo awm ve! tih te chu ka ngaihtuah ta mai mai a. Ziaka a that miau chuan kan ni poh ang chu.
Rinawm turin kan infuih a. Pathian hlau chunga dik taka thil ti tawh turin hnathawktute pawh kan phut a ni. Biak Inah rinawm la, hmun dangah pawh rinawm rawh.
Ei ru suh!
Biak in pawnah i pulpit sawn rawh.