KOHHRANIN ZAH A PHU

By Rev Dr Ramengliana
Kohhran hi ‘Krista Taksa’ kan ti na vang vangin hmuhsit, endawng leh cheksawlhte pawh tuar fo mah se a inhmeh dan a awm a. Khawvel tehfung atanga hausakna, ropuina leh thiltihtheihna te hi a thatpui ber thil a ni lo fo a ni. Hrehawmna leh tuarna ten a thli fim a, a nihna tak a pho chhuak thin. Amaherawhchu, tuar leh rethei ngawr ngawr tura ngaih bik tur chu a ni lem lo thung ang. Kristian tamna ramah te phei chuan zahawm leh thiltithei a ni lo thei lo zawk thin a. Pathian lam thil hmuh theih ‘serh’ a nih miau avangin a dinhmun hi a hluin a pawimawh hle a ni. Ringtu tu pawh mai hian Kohhran hi a chak a, a nih tur ang tak a nih theih nana kan tan theuh hi a va tul tak em!
Krista Thawhlehnain a nghawng chhuah liau liau
Zirtirte kha an sakhaw hmasaah khan an lungawi hneh hle a. Sakhaw thar din tumna an nei miah lo. Lo tum ta pawh ni se thei awma ngaih theih pawh va ni suh. Thingtlang mimawl kan tih, kut hnathawk ve mai mai, sangha mantu, sakhaw lam leh khawvel lama thiamna nei mumal an awm lo a nih kha. Matthaia kha chhiahkhawntu ni ve ngat a nih avang khan a ziaawm awmchhun a ni mai thei. An treasurer Juda Iskariota khan belh leh paihte chu a ti thei ve nual a ni mahna. Sakhaw nghet leh kherkhiap lutuk Juda sakhua su dar turin theihna leh tumna an nei pha lo hrim hrim. Amaherawhchu, an rinpui ber, Mesia tura ngaih khenbeha a awm vanga an beidawn em em Isua kha a thih hnuah a rawn thawhleh miau avang khan an nih nih an nihpui chho ta rawih kha a nia. Thawhlehna kha an mithmuhah phat rual lohvin a chiang tawh si! Mosia dan, inthawina, hnam thlan, temple an kalsan veka, thih hnua chhandam leh chhandam loh thlengin an risk tawh a ni ber e. A chhan pawh Isua thawhlehna khan khang zawng zawng kha a chaldelh a; a awmzia leh hlutna Pentecost niah Thlarau Thianghlimin a rawn hriattir tawh bawk si. Khawvel dan piah lama Isua thawhlehna nena inzawm tlat, chu Thawhlehna-in a nghawng chhuah chu a nih miau avangin zah a phu ngawih ngawih a ni tih a lang. Mihringte tum dan, duh zawng leh tha tih dana din a ni lo va (tuman din an tum lo!), Pathian thiltihtheihna avang liau liaua tum lawk loh taka lo ding ta a ni a, Zirtirte phei chu thihna nena an thleng tlaka ngai vek an nih kha maw.
Pawhlah taka chhaih mai mai chi a ni lo
Sual leh thihna hnehna avanga mihringte beiseina piahlam daiha rawn ding ta Kohhran chuan zah a phu ngei e. Pawn lam mite chuan pawl pakhatah ngai mai mah se a chhunga mi, a nihna thuk tak hretute tan chuan a hlu em em thung ang. Khawvel piah lam thiltihtheihnaa innghat, mihring ruahman lawkna anga din ni lo a ni si a. Chutih rualin Kohhran zahawmna sawi chang hian Kohhran hruaitute en kan a memberte tih tura ngaih mai a awl angreng hle a ni. Kohhran committee thuchhuak zawng zawng hi Pathian Thu anga zah tura inbeiseina a lian thin. Committee memberte pawhin kan rorel apiang hi Pathian Thu emaw mawlmang taka tih mai theih a ni. Han ngaihtuah chian chuan Kohhran zah nasa bertu tur chu Pastor leh Upate hi an ni zawk awm asin. Kohhran kalsiam rorelnaa tel an ni a, zah taka Pathian duhzawng an zawn a ngai. Chumi ti tur chuan Pathian Thu zir leh ngaihtuah thiam nihte pawh a ngai a nih hi. Rilru seng a, inzir reng leh ngaihtuahna vawrhvir a va tul tak em! Fimkhur tawpa rel si lova committee thutlukna apiang Pathian Thu dik lo thei lo ang maia memberte burbun mai thin an chin chuan a pawi hun a thleng ngei ngei ang le. Kohhran zah avang chauhvin an eizawnna leh nawmna zawn dan thlenga an fimkhur a va tul tehreng em! Kohhran hi chhaih mai mai chi a ni hauh si lo va.
Hruaitu chan changten an zah hle ang
Pastor leh Upate zingah mawhphurhna sang tak an neih hmang suala mahni mimal duh dana thutlukpui tum tlat a awm palh theih. Kohhran hi Pathian ropuina kan hmuhna hmun leh ama tana kan insawr chhuahna hmun a nihzia hai dera mahni inchhekarbawmna hmanrua atana hman tum ta tlat te pawh awm theih a ni. Kristian tamna hmunah chuan thiltihtheihna leh zahawmna a ken tel ve miau avang hian chutiang thil an chante chu Lalpa ropuina lan chhuahna hmanrua ni lova mahni ropuina tel tumna te a lo awm thei ang. Tin, mimalin an lawm loh zawngte laka phuba lakna hmanrua atan te pawh Kohhran rorelna hi hruai kawi theih a ni. Chung zawng zawnga inthiarfihlim tur a nih mai bakah rilru leh thlarau chawl lova inzir ngar ngar tur a ni ang chu. Kohhran nihna hi a sang em mai a, a chhunga mawhphurhna sang neitute hi a zah nasa bertu an nih a ngai. A tawi zawngin, Kohhran aw chu Pathian aw a ni kan tih thin hi ‘Pathian Aw’ dik tak a nih zel theih nan inzir, uluk leh Pathian Thu hriat leh Amah pawl tam a va pawimawh tehreng em! Pawhlah taka rorelna te ‘Pathian Aw’ intih liam khum mai mai chi a ni lo. Pathian duh zawng lova hruai palh phei chu a pawi dan tur ngaihtuah thiam har khawp a ni.
Memberten a zahawmzia pawh a ngai
Kohhran chhungah hian Kohhran nihna tak hmu thiam pha lo khawpa chhah a awm theih laiin Kohhran nunphung pangngai duh tawk lo leh kham tawk lo khawpa lo rau san tawk pawh awm theih a ni. Tin, committee rorelte ringhlel leh khamkhawp lo taka sel pawl an lo awm reng bawk thin. A reltu atana Pathianin a ruat rih lohte hian rel fel phet kan lo tum thin hi a buaithlak ve bawk a ni. An hriat ang kan hre vekin an ngaihtuahna sen zah kan seng tawh pawh a ni hauh si lo vang a! Thil nuihzatthlak angreng tak zawk a ni! Kohhran kalphung chungchangah member tu pawhin sawi theih chin kan nei vek mai, sawi thei tura thlarau leh hriatna lama tan lak pawh a tha, mahse sel tur kan nih pawhin hriatna leh thlarau nuna seltlak kan nih theihna turin mahni lam kan inthuam ve phawt a ngai thin. Chu chu memberten Kohhran kan zah dan tur chu a ni ang. Thinchhiat vang, kheuhbeuh vang, hruaitute huat hrim hrim vang tea selna anka chhakchhuak fo kan nih chuan kan tifuh bik lo ngei ang le. Kohhran hian zah a phu thlawt mai. Memberten kan zah a phu. Chumi zahnaah chuan Kohhrana rorel tura Pathian ruatte thutlukna pawm thiam te pawh a tel ngei ang. ‘Kohhran aw hi Pathian aw a ni’ ti khawpma intulut thei member chu Pathianin a hre reng dawn tih a chiang a ni. Chutih rualin membertin hian Krista Kohhran siamtha turin mawhphurhna kan nei theuh tih hriaa ngaihtuahna, finna, tha leh zung kan sen a ngai a ni tih hi i hre mawlh teh ang u.